കവിത - യി ഷാ (പരിഭാഷ)

നന്ദിയുള്ള കുടിയൻ
യി ഷാ(ചൈനീസ്, ജനനം: 1966)

ഒരു കുടിയൻ
വാളു വയ്ക്കുകയായിരുന്നു
നഗരത്തിൽ.
നഗരച്ചാലിന്റെ പാലത്തിന്മേൽ,
അസ്തമയ സൂര്യന്റെ തീക്ഷ്ണപ്രഭയിൽ.
ഒരവസാനവുമുണ്ടായിരുന്നില്ലതിന്.
ശ്വാസകോശത്തിന്റെ മുകളറ്റം കൊണ്ടു
പാട്ടു പാടുന്ന പോലെ തോന്നിച്ചു, അയാൾ.
തിന്നതൊക്കെ പുറത്താക്കി,
പിത്തരസം പോലും.
പണി കഴിഞ്ഞു വീട്ടിലേക്കു മടങ്ങുമ്പോൾ
ഞാനതിൽ കുരുങ്ങി നിന്നു.
ഉള്ളിലൊരാന്തലോടെ പെട്ടെന്നെനിക്കു ബോധ്യമായ്
ജീവിതത്തോടു നന്ദി പ്രകാശിപ്പിക്കാൻ
ഓരോരുത്തർക്കും അനന്യമായ സ്വന്തം വഴിയുണ്ടെന്ന്.