പൊടിപ്പുകൾ - പി.രാമൻ

നാടകം തുടങ്ങുമ്പോൾ

പശ്ചാത്തലത്തിലുണ്ടായിരുന്ന മരം ഓർക്കുന്നു.
അതിന്റെ കരിഞ്ഞുണങ്ങിയ ചില്ലകളും
ഓർക്കുന്നു.

ഒന്നും സംഭവിക്കാത്ത നാടകം.

എങ്കിലുമൊടുവിൽ
കരിഞ്ഞ ചില്ലകളിൽ
രണ്ടു പച്ചപ്പൊടിപ്പുകൾ

അല്ല.
രാത്രി
നാടകമവസാനിക്കുമ്പോൾ
രാവിലെ വടിച്ചു മിനുക്കിയിറങ്ങിയ കവിളത്ത്
ചില നരച്ച പൊടിപ്പുകൾ

മറ്റൊന്നുമുണ്ടായില്ല.
ഒരു ഗോദോയും വന്നില്ല.
എങ്കിലും രാക്കണ്ണാടിയിൽ
അവ തെളിഞ്ഞു കത്തുന്നു.