എമാദ് ഫുവാദ് കവിതകൾ (പരിഭാഷ, ഈജിപ്ത്, ജനനം: 1974)

1.

തീയേറ്റർ

കോമഡി:

ഒരു മനുഷ്യൻ ഉറങ്ങുമ്പോൾ കരഞ്ഞു കൊണ്ടു തൻ്റെ നേരേ വന്ന് ആത്മഹത്യാ ഭീഷണി മുഴക്കി കലഹിക്കുന്ന ഒരു സ്ത്രീയെ സ്വപ്നം കാണുന്നത്.

ബ്ലാക് കോമഡി:

ഉറക്കത്തെക്കുറിച്ച് ചിന്തിക്കാൻ പോലും പിന്നെ ആ മനുഷ്യൻ ഭയക്കേ, ആ സ്ത്രീ തിരിച്ചു വന്ന് വീണ്ടും ആത്മഹത്യാ ഭീഷണി മുഴക്കുന്നത്.

ട്രാജഡി:

ഭീഷണി മുഴക്കിപ്പോയ അവൾ പറഞ്ഞ പോലെ ആത്മഹത്യ ചെയ്യുന്നത്.

അബ്സേഡ്:

അയാൾ അവളെയോർത്തു വിലപിക്കുന്നത്.

2. 

പിടപ്പ്.

മീൻ പിടിക്കുമ്പോൾ

എന്നെ ഏറ്റവും ആകർഷിച്ചിട്ടുള്ളത്

വെള്ളത്തിൽ നിന്നു പകൽ വെളിച്ചത്തിലേക്കു

പിടിച്ചിടുന്ന മീനുകളുടെ പിടച്ചിലാണ്.

ചൂണ്ടയിൽ മുറുക്കിപ്പിടിക്കുന്നതു വഴി

ഒട്ടും കുറയാതെ

എന്നിൽ മുഴുവനായെത്തുന്ന പിടച്ചിൽ.

ഈ കുലുക്കവും പിടച്ചിലും

ഒരു വേട്ടക്കാരനായിരിക്കുന്നതിൻ്റെ അർത്ഥം

എന്നെ പഠിപ്പിക്കുന്നു.

ഒരു വേട്ടക്കാരനാവാൻ

നിർബന്ധിതനാവുന്നതിൻ്റെ അർത്ഥം.

ആ ആന്തൽ

ജീവിതം മുഴുക്കെ എന്നെ പിന്തുടർന്നു.

കുഞ്ഞുന്നാളിൽ

മാമനോടൊപ്പം

എന്നും ഉച്ചക്ക്

ആഹാരത്തിനു വക തേടി

പുഴയിലേക്കു പോകുന്ന കാലം തൊട്ട് ;

വിശക്കുന്ന ഒരു കുടുംബത്തിനു വേണ്ടി.