മിന്നലുകൾ - സലാഹ് ഫായിക് (പരിഭാഷ, അറബിക്, ഇറാഖ്, ഇപ്പോൾ ഫിലിപ്പൈൻസിൽ, ജനനം: 1945)

(ഏതാനും ഖണ്ഡങ്ങൾ )

1

എല്ലാറ്റിലുമുള്ള എന്റെ വിശ്വാസം നഷ്ടപ്പെടാൻ

ഒരു നഗരം, ഒരു ചെറു നഗരം, ധാരാളം.

അതാണ് വർഷങ്ങളായി ഞാനൊരു

സങ്കല്പ ഗ്രാമത്തിൽ ജീവിക്കുന്നത്.

എന്നോ നഷ്ടപ്പെട്ട എന്റെ കൂടപ്പിറപ്പ്

ഒരു മുന്തിരിത്തോട്ടത്തിൽ 

മുന്തിരി പറിച്ചു നിൽക്കുന്നത്

സൂചിക്കണ്ണിലൂടെ

ഞാൻ കാണുന്നു.

2

സൂര്യഗ്രഹണം എന്നെ ആഹ്ലാദിപ്പിച്ചു.

സൂര്യന്റെ ചുവന്ന ചിറകുകൾ ഞാൻ കണ്ടു

എന്നോടു ചേർന്നു നിന്ന്

ഗിൽഗമേഷും അതു കണ്ടു

3

കടൽത്തിരകൾക്ക്

മലമുടികളുടെ സമ്മാനമായ

ഈ വെള്ളച്ചാട്ടം

എന്റെ മുറിയിരിക്കുന്നേടത്തെ

അഗ്നിപർവതത്തിനു നേർക്ക്

വീർത്തു പൊള്ളച്ചു വരുന്നു.

4

കൂട്ടുകാരുടെ പാർട്ടികളിൽ

ഞാൻ നൃത്തം ചെയ്തു.

അവർ മരിച്ചു പോയി.

ഒരാൾക്കു പിറകേ മറ്റൊരാളായി.

5

കൊല്ലങ്ങളായി,ഞാനങ്ങുമിങ്ങും

കഷ്ടപ്പെടുന്നു.

ഇപ്പോൾ ഒരു കുശിനിക്കാരന്റെ വേഷത്തിൽ.

ഇപ്പോൾ ജിപ്സികൾ കത്തി കൂർപ്പിക്കുന്നേട ത്ത്.

മുകളിലെ സമചതുരത്തിലുള്ള ചന്ദ്രനിൽ

എനിക്കൊരു താല്പര്യവുമില്ല.

കൊല്ലങ്ങളായി കാത്തു നിൽക്കുന്ന

ചീഞ്ഞഴുകലിലും.

കഷ്ടപ്പെടുന്നു ഞാനങ്ങുമിങ്ങും

കൊല്ലങ്ങളായി.

6

തന്റെ കവിതകളിലൊന്നിൽ നിന്ന്

ഓടി രക്ഷപ്പെട്ട ഒരു മുയലിനെ

തുറമുഖത്ത് കപ്പൽ കാത്തു നിൽക്കുമ്പോൾ

അയാൾ കണ്ടെത്തി :

      - സർ, താങ്കൾ ചുമ്മാ ഒരു യാത്രക്കാണോ

        അതോ കുടിയേറ്റമോ?

      - കുടിയേറ്റമാണ്.ഈ രാജ്യം എനിക്കു 

        മതിയായി.

      - ഞാനെന്തെങ്കിലും തെറ്റു ചെയ്തോ

        നിന്നോട്?

        എന്തിനാണ് എന്റെ കവിത വിട്ടുപോയത്?

      -  താങ്കൾ എന്നെ ഒരു മുയലായിപ്പരിഗണി

         ക്കുന്നതിനു പകരം ഒരു വേലക്കാരനെ

         പ്പോലെ പരിഗണിച്ചു. അല്ലെങ്കിൽ ഒരു 

         നായെപ്പോലെ.ചിലപ്പോഴൊക്കെ ഒരു

         പെണ്ണിനെപ്പോലെയും. അതെന്നെ

         വേദനിപ്പിച്ചു.