നാല്പതിലെത്തിയ ആണുങ്ങൾ - ഡൊണാൾഡ് ജസ്റ്റിസ് (പരിഭാഷ, യു.എസ്.എ,1925 - 2004)

ഒരിക്കലും മടങ്ങിപ്പോകാത്ത

മുറികളിലേക്കുള്ള വാതിലുകൾ

പതിയെ അടയ്ക്കാൻ പഠിക്കുന്നു

നാല്പതിലെത്തിയ ആണുങ്ങൾ

കേറിച്ചെന്ന പടിത്തട്ടിൽ തെല്ലിളവേൽക്കെ

കാൽക്കീഴിലൊരു കപ്പൽത്തട്ടു പോലതു

നീങ്ങുന്നത് അവരനുഭവിക്കുന്നു.

പതിഞ്ഞ ചാഞ്ചക്കമാണെങ്കിലും.

കണ്ണാടികളുടെ ആഴത്തിൽ

അവർ വീണ്ടും കണ്ടെത്തുന്നു

ആരും കാണാതെ അച്ഛൻ്റെ ടൈയെടുത്തു

കെട്ടാൻ പഠിക്കുന്ന പയ്യൻ്റെ മുഖം.

ആ അച്ഛൻ്റെ മുഖത്തിപ്പൊഴും

ഷേവിങ് ക്രീമിൻ്റെ നിഗൂഢസുഗന്ധം.

മക്കളെക്കാളേറെ അച്ഛന്മാർ, അവരിപ്പോൾ.

എന്തോ ഒന്ന് അവരെ നിറക്കുന്നു,എന്തോ ഒന്ന്.

അവരുടെ പണയത്തിലായ വീടിനു പിന്നിലെ

ചെരിവിന്നടിയിലെ കാട്ടിൽ നിറയുന്ന,

അന്തിവെളിച്ചത്തിലിടവിടാതുയരുന്ന

ചീവീടിനൊച്ചപോലെന്തോ ഒന്ന്.

- 1967