ഇന്നിസ്ഫ്രീയിലെ തടാകദ്വീപ് - ഡബ്ലിയു.ബി.യേറ്റ്സ് (പരിഭാഷ)

എഴുന്നേറ്റു ഞാൻ പോകുമിന്നിസ്ഫ്രീയിലേക്കിപ്പോൾ

കളിമണ്ണിനാൽ കമ്പാൽ ചെറു ചായ്പ്പൊന്നുണ്ടാക്കും.

ഒമ്പതേരിയായ് പയർ നട്ടിടും തേനീച്ചക്കൂ -

ടുണ്ടാക്കിയതിൻ മൂളൽപ്പരപ്പിലൊറ്റക്കാവും.

അവിടെസ്സമാധാനമെനിക്കുണ്ടാവും, മെല്ലെ -

ക്കിനിയും സമാധാനം, പുലർകാലത്തിൻ മൂടു-

പടങ്ങൾക്കുള്ളിൽ നിന്നു ചീവീടു പാടുന്നേട -

ത്തിറ്റുന്ന സമാധാനം, അങ്ങു പാതിരാവൊരു

മങ്ങിയ വെട്ടം, നീലലോഹിതനിറമാർന്ന

തിളക്കം ഉച്ച, കിളിച്ചിറകേ സായന്തനം.

എഴുന്നേറ്റു ഞാൻ പോകുമിപ്പോൾ, രാപ്പകൽ നീളെ

തീരമാത്തടാകത്തിൻ വെള്ളത്തെത്താലോലിക്കും

മന്ദ്രനിസ്വനം,ചരൽപ്പാതയിൽ നിൽക്കെക്കേൾക്കു -

ന്നിതു ഞാൻ ഹൃദയത്തിന്നത്യഗാധതക്കുള്ളിൽ