യു ഗ്വാങ്ഷോങ് കവിതകൾ (പരിഭാഷ, ചൈനീസ്, തായ് വാൻ, 1928-2017)

1
മഴ രാത്രി മുഴുവൻ പറഞ്ഞു കൊണ്ടിരിക്കുന്നതെന്ത്?

എന്താണ് മഴ
രാത്രി മുഴുവൻ പറഞ്ഞുകൊണ്ടിരിക്കുന്നത്?
മുകൾനിലയിലെ ദീപം
ജനലരികിലെ വൃക്ഷത്തോടു ചോദിക്കുന്നു.
ജനലരികിലെ വൃക്ഷം
താഴെ നിരത്തിലെ കാറിനോടു ചോദിക്കുന്നു.
എന്താണ് മഴ
രാത്രി മുഴുവൻ പറഞ്ഞു കൊണ്ടിരിക്കുന്നത്?

താഴെ നിരത്തിലെ കാറ്
ചക്രവാളത്തിലേക്കു പോകുന്ന പാതയോടു ചോദിക്കുന്നു
ചക്രവാളത്തിലേക്കു പോകുന്ന പാത
അരുവിക്കുമേലുള്ള പാലത്തോടു ചോദിക്കുന്നു
അരുവിക്കുമേലേയുള്ള പാലം
എന്റെ ആൺ കുട്ടിക്കാലം നിവർത്തിയ
കുടയോടു ചോദിക്കുന്നു.
ആൺകുട്ടിക്കാലം നിവർത്തിയ കുട
അകംപുറം നനഞ്ഞ ഷൂസിനോടു ചോദിക്കുന്നു
അകംപുറം നനഞ്ഞ ഷൂസ്
പേക്രോം പേക്രോം തവളകളോടു ചോദിക്കുന്നു
പേക്രോം പേക്രോം തവളകൾ
എങ്ങും പെയ്യുന്ന മഞ്ഞിനോടു ചോദിക്കുന്നു
എന്താണ് മഴ
രാത്രി മുഴുവൻ പറഞ്ഞു കൊണ്ടിരിക്കുന്നത്?
പെയ്യുന്ന മഞ്ഞ്
മുകൾനിലയിലെ ദീപത്തോടു ചോദിക്കുന്നു
മുകൾനിലയിലെ ദീപം
ദീപത്തിനു ചുവട്ടിലെ മനുഷ്യനോടു ചോദിക്കുന്നു
ദീപത്തിനു ചുവട്ടിലെ മനുഷ്യൻ
തലയുയർത്തി ചോദിക്കുന്നു:

           എന്താണിപ്പോഴും മഴ
           പെയ്തു കൊണ്ടേയിരിക്കാൻ?
           പ്രാചീനയുഗം തൊട്ട്
           ഇന്നു രാത്രി വരെയും.
           ഒരു തുള്ളി തൊട്ടു പെരുമഴ വരെയും
           ഓട്ടിറമ്പു തൊട്ടു കടൽക്കര വരെയും.

ഒച്ചിന്റെ വേഗമുള്ള പായലേ,
ഞാൻ നിന്നോടു ചോദിക്കുന്നു,
എന്താണ് മഴ
രാത്രി മുഴുവൻ പറഞ്ഞു കൊണ്ടിരിക്കുന്നത്?

1986

2.
വീടോർമ്മ

കുഞ്ഞുന്നാളിൽ
വീടോർമ്മ ഒരു തപാൽ സ്റ്റാമ്പ്
" ഇവിടെ ഞാൻ
അവിടെ ...... എന്നമ്മ "

പിന്നെ മുതിർന്നപ്പോൾ
വീടോർമ്മ ഒരു യാത്രാട്ടിക്കറ്റ്
''ഇവിടെ ഞാൻ
അവിടെ..... യെന്റെ വധു "

പിൻ വർഷങ്ങളിൽ
വീടോർമ്മ ഒരു കുഴിമാടമായ് മാറി
" ഇവിടെ ഞാൻ
അവിടെ...... യെന്നമ്മ "

ഇന്നിപ്പോൾ വീടോർമ്മ
ഒരു കടൽപ്പിളർപ്പായ് പരക്കുന്നു
" ഇവിടെ ഞാൻ
അവിടെ........ യെൻ വൻകര "