കരിമ്പുലി - റിൽക്കേ (പരിഭാഷ)

മങ്ങി മായുന്നൂ കാഴ്ച്ചയഴികൾ കാണെക്കാണെ

ഇല്ലവന്നാവുന്നില്ല യാതൊന്നും ഗ്രഹിക്കുവാൻ

അഴികളാണീ ലോകമവന്ന്, നൂറായിര -

മഴികൾ, അഴികൾക്കു പിന്നിലോ നിശ്ശൂന്യത.

ആയത്തിലൊഴുക്കനെത്താളത്തിൽ വട്ടം കറ-

ങ്ങീടുന്നുണ്ടവനൊരു സൂക്ഷ്മ കേന്ദ്രത്തെച്ചുറ്റി

ഊർജ്ജത്തിൻ നൃത്തം പോലെ,യതിൽ നിസ്തബ്ധം നില്പൂ

മരവിച്ചുറഞ്ഞൊരു മഹത്താമിച്ഛാശക്തി.

നിശ്ശബ്ദം പൊങ്ങും കൃഷ്ണമണി തൻ തിരശ്ശീല -

യെപ്പൊഴെങ്കിലും...... കേറുമതിലേയൊരു രൂപം

ചുമലിന്നിറുകിയ മൂകതയ്ക്കുള്ളിൽ കൂടെ 

വഴുതി ഹൃദയത്തിലെത്തിടും മരിച്ചിടും.