പരിചരണം - പി.രാമൻ

പാമ്പുറ കണ്ട്
എത്ര പേടിച്ചിട്ടുണ്ട്.
പതിവായി കാണാറ്
കിണറിന്റെ ആൾമറമേൽ.
കിണറ്റിനുളളിലേക്ക് ഇറങ്ങിപ്പോയോ മൂർഖൻ
കിണറ്റിൽ നിന്നും കേറിയെങ്ങോട്ടു മാഞ്ഞോ?

മുടി ചീകുമ്പോൾ താരനുതിരുന്നു.
എന്റെ ശരീരം പൊഴിക്കേണ്ട പാമ്പുറ
പൊട്ടിപ്പൊടിഞ്ഞു തരിയായി വീഴുന്നു.

2
എല്ലു ഞൊട്ടയ്ക്കുമ്പൊഴെത്ര സുഖം!

കയ്യെല്ലു ഞൊട്ടയ്ക്കുമ്പോൾ
ചെയ്യേണ്ട കർമ്മങ്ങളിൽ നിന്നൊക്കെയും
കയ്യു സ്വതന്ത്രമാകുന്ന പോലെ.

കാലെല്ലു ഞൊട്ടയ്ക്കുമ്പോൾ
താണ്ടേണ്ട ദൂരങ്ങളിൽ നിന്നൊക്കെയും
കാലു സ്വതന്ത്രമാകുന്ന പോലെ.

നട്ടെല്ലു ഞൊട്ടയ്ക്കണമെന്നുണ്ട്.
അതിനു കഴിയാതെയിപ്പോൾ
ഞെളിപിരി കൊള്ളുന്നു.