തനിച്ചു പോകും ഞാൻ - പി.രാമൻ

പുറത്ത് നിർത്താതെ

കുരക്കുന്നൂ നായ്ക്കൾ

മുറിയിലൊറ്റക്കു

കിടക്കയാണവൻ

അറിയാത്ത നാട്ടിൽ

അറിയാത്ത നായ്ക്കൾ

വിരുന്നു വന്നതാ-

ണളിയൻ്റെ വീട്ടിൽ

ചുമരിനപ്പുറ -

ത്തുറക്കമാണവർ

കിടന്നിട്ടില്ലൊറ്റ -

ക്കിതു വരേയ്ക്കവൻ

അറിയില്ലേ ചേച്ചി -

ക്കതോ മറന്നുവോ?

പുറത്തു കാറ്റിൻ്റെ -

യിരമ്പം പൊങ്ങുമ്പോൾ

കുര നിർത്തി നായ്ക്ക -

ളമർത്തി മോങ്ങുന്നു.

അവർ കിടക്കുന്ന

മുറിയുടെ വാതിൽ

പതുക്കെ മുട്ടുവാ-

നെഴുന്നേറ്റൂ പയ്യൻ.

പൊടുന്നനെപ്പുറ-

ത്തുറക്കനെക്കുര,

തിരിച്ചവൻ ചെന്നു

കിടക്കയിൽ വീണു

പുതപ്പെടുത്തിട്ടു

തലവഴി മൂടി.

അവനുറക്കത്തിൽ

വിഴാൻ തുടങ്ങുമ്പോൾ

അളിയൻ്റെ കൂർക്കം

കൊളുത്തുന്നൂ പിന്നിൽ

പിടിച്ചു നിർത്തീട്ടു

കടയുന്നൂ വയർ

ഇനിയൊഴിക്കാതെ

കിടക്കുവാൻ വയ്യ.

പുറത്തു കക്കൂസു -

ണ്ടടുക്കളപ്പിന്നിൽ

അവിടെയും നിന്നു

കുരയ്ക്കുന്നൂ നായ്ക്കൾ.

വിളിക്കാം ചേച്ചിയെ.

വിളിച്ചിട്ടുമവർ

ഉണരുന്നില്ലല്ലോ.

എണീറ്റിരുട്ടത്തു

ചുമരിന്മേൽ തപ്പി -

യൊടുവിൽ കൈ സ്വിച്ചിൽ

തടഞ്ഞു ലൈറ്റിട്ടു

പതുക്കെ വാതിലു

തുറക്കുവാനാഞ്ഞു

അടുക്കളപ്പിന്നിൽ

പുറത്തു കക്കൂസ്

അതിൻ്റെ പിന്നിലായ്

അലറുന്നൂ നായ്ക്കൾ

അടിവയറ്റിലോ

കനത്തു വിങ്ങുന്നു.

ഒടുവിലൊക്കെയു-

മടങ്ങിയശേഷം

പതുക്കെയൊന്നു ക-

ണ്ണടച്ചതേയുള്ളൂ.

എണീറ്റപ്പോൾ തന്നെ

മനസ്സിലോർത്തവൻ:

"മടങ്ങണമുച്ച -

കഴിഞ്ഞ ബസ്സിന്

എനിക്കില്ലാ പേടി,

തനിച്ചു പോകും ഞാൻ"