ചക്രവാളം - ടെൻസിൻ സുൻഡ്യു (ടിബറ്റ്)

വീട്ടിൽ നിന്നെത്തി നിങ്ങൾ

ഈച്ചക്രവാളത്തി,ലിവിടെ.

ഇവിടെ നിന്നും മറ്റൊരിവിടേ -

യ്ക്കിവിടെനിന്നിനി നിങ്ങൾ പോകൂ

അവിടന്നു തൊട്ടപ്പുറത്തേ-

യ്ക്കവിടന്നടുത്തതിലേയ്ക്കും.

ചക്രവാളം തൊട്ടു ചക്രവാളം വരെ

ഓരോ ചുവടുമൊരു ചക്രവാളം.

ഓരോ ചവിട്ടടിയുമെണ്ണൂ

എണ്ണം മനസ്സിൽ സൂക്ഷിക്കൂ.

വെള്ളാരങ്കല്ലുകൾ പെറുക്കൂ

ഇലകൾ വിചിത്രം പെറുക്കൂ

വളവുകൾ നോക്കി വെയ്ക്കൂ - മാമല -

ന്തൂക്കുകളടയാളം വെയ്ക്കൂ

നിങ്ങൾക്കുപകരിച്ചേക്കാം

വീട്ടിൽ മടങ്ങി വരുവാൻ