എമിലി ഡിക്കിൻസൺ കവിതകൾ (യു.എസ്.എ, 1830-1886)

1.

വിജയമാണേറ്റവും മധുരമെന്നെണ്ണുവോർ

ഒരുനാളും വിജയിച്ചിടാത്തോർ

കഠിനമാമാവശ്യമുണ്ടെങ്കിലേയിറ്റു -

മധുകണത്തിൻ മൂല്യമറിയൂ

പാറും പതാകയുമേന്തി നിൽക്കുന്നൊരീ

ചോപ്പണി സൈന്യത്തിലാർക്കും

ആവില്ല നിർവചിക്കാൻ വിജയത്തിനെ-

യത്ര മേൽ സുവ്യക്തമായി.

തോറ്റ പടയാളി മൃതി കാത്തു കിടക്കവേ

കൊട്ടിയടച്ചൊരാ കാതിൽ

വ്യക്തമണയുന്നു കൊടുനോവേകി ദൂരത്തു

നിന്നു വിജയോന്മത്തനൃത്തം.

2

മരിച്ചൂ സൗന്ദര്യത്തി-

നായി ഞാൻ - എന്നാലിപ്പോൾ

ഞെരുങ്ങിക്കഴിയുന്നീ -

ക്കുഴിമാടത്തിന്നുള്ളിൽ

തൊട്ടരികിലെക്കുഴി-

മാടത്തിൽ കിടപ്പുണ്ടു

മറ്റൊരാൾ - സത്യത്തിനായ് 

ജീവിതം വെടിഞ്ഞൊരാൾ

"തോറ്റതെന്തിനായ്?" 

മൃദുവായവൻ ചോദിക്കുന്നൂ

തോറ്റതു സൗന്ദര്യത്തി-

നായി, താങ്കളോ?" "തോറ്റൂ

സത്യത്തിനായ് ഞാൻ, രണ്ടു -

മൊന്ന്, സോദരർ നമ്മൾ"

ബന്ധുക്കളൊരു രാവിൽ 

കണ്ടുമുട്ടിയ പോലെ

മിണ്ടി നാം മുറികളിൽ 

കിടന്ന്, പായൽ വന്നു

ചുണ്ടോളമെത്തും വരെ

പേരുകൾ മൂടും വരെ.

3.

ആരുമല്ല ഞാൻ! ആരു നീ? യെന്നെ -

പ്പോലെയാരുമല്ലാതൊരാൾ?

എങ്കിൽ നമ്മളിണകളായ് - പുറ -

ത്താക്കിടുമവർ കേൾക്കുകിൽ

ആരെങ്കിലുമാവുകയെത്ര

സങ്കടം, പരസ്യാത്മകം!

തവളയെപ്പോൽ ചതുപ്പിനോടു തൻ

പേരു ചൊല്ലി നാൾ പോക്കുക.

4

കുഞ്ഞുകുഞ്ഞൊരു തോണി

തെന്നി നടന്നൂ കടലിൽ

വമ്പൻ വമ്പൻ കടലോ

കണ്ണു കാട്ടി വിളിച്ചൂ.

കൊതിയൻ കൊതിയൻ തിരയൊ -

ന്നതിനേ നക്കിയെടുത്തു

അന്തസ്സുള്ളൊരു യാനം

തരമാകാതതു താണു.

5

പുലരിയെപ്പോൾ വരു,മതിന്നുമുണ്ടോ കിളി -

ത്തൂവലുകൾപോൽ തൂവൽ,തീരത്തിനുള്ള പോൽ

വൻതിരമാലകൾ, ഒന്നൊന്നുമറിയാതെ

വാതിലോരോന്നും തുറക്കുകയാണു ഞാൻ.

6

വന്യരാത്രികൾ! വന്യരാത്രികൾ!

നിന്നരികിൽ ഞാനെങ്കിൽ

വന്യരാത്രികൾ നാമിരുവർക്കു -

മെന്തൊരുത്സവമായിടും!

ഹൃദയമെത്തീ തുറമുഖത്തിനി

വെറുതെ വീശുന്നു കാറ്റുകൾ

മതി മതി ദിശാസൂചികൾ

മതി മതി, ഭൂപടങ്ങളും.

ഏദനിൽ തുഴഞ്ഞീടുക!

ഹാ, കടൽ! പക്ഷെ,യിന്നു ഞാൻ

നിന്നിൽ നങ്കൂരമാഴ്ത്തുമീ

വന്യരാത്രിയിൽ നിശ്ചയം

7

അരുവിയോടു കടൽ പറഞ്ഞു 'വരു വരൂ'

അരുവി ചൊല്ലി, 'യനുവദിക്കു വളരുവാൻ'

കടൽ പറഞ്ഞു 'കടലു തന്നെയായിടും

വളരുകിൽ, കൊതിപ്പു ഞാനൊരരുവിയെ'

8

മറ്റേതു നിറത്തെക്കാളും

മഞ്ഞ കുറച്ചേ ചാലിക്കൂ

പ്രകൃതി,യവൾ കാക്കുകയാണതു

സൂര്യാസ്തമയങ്ങൾക്കായ്

അവൾ വാരിച്ചൊരിഞ്ഞിടുന്നതു

നീല നിറം, നീല നിറം

ഒരു പെണ്ണു കണക്കവൾ ചെലവാ -

ക്കുന്നൂ കടു ചോപ്പു നിറം

കരുതിത്താനുപയോഗിപ്പൂ

മഞ്ഞ നിറം ചിലെടം മാത്രം.

പ്രണയി മൊഴിഞ്ഞീടും വാക്കുകൾ

പോൽ സവിശേഷ, മമൂല്യം

9

വാക്കു മരിപ്പൂ

പറഞ്ഞു തീർന്നാ-

ലുടനേയെന്നു ചിലർ

ആരംഭിച്ചീ-

ടുന്നേയുള്ളതു

ജീവിക്കാൻ - ഞാൻ പറയും.

10

ഞാനെൻ്റെ പൂവിന്നകത്തൊളിപ്പൂ

നീ മാറിടത്തിലണിഞ്ഞ പൂവിൽ

ശങ്കിക്കാതെന്നെയും നീയണിവൂ,

പിന്നെല്ലാം മാലാഖമാർക്കറിയാം.

ഞാനെൻ്റെ പൂവിന്നകത്തൊളിപ്പൂ

നിൻ്റെ പൂപ്പാത്രത്തിൽ വാടും പൂവിൽ

നീ ശങ്കയില്ലാതനുഭവിപ്പൂ

ഏതാണ്ടൊരേകാന്തതയെനിക്കായ്.