മുന്നിൽ നീ - പി.രാമൻ

വട്ടം കറങ്ങി മുകളിലെത്തി

താഴേക്കിറങ്ങുമ്പോൾ

യന്ത്ര ഊഞ്ഞാലിലിരിക്കുന്നവൻ്റെ

അടിവയറ്റിൽ നിന്നു പൊന്തുന്ന പോലെ

ഒരാന്തല്.

തണുത്ത കാറ്റടിച്ചപ്പോൾ.

താഴെ നോക്കിയാൽ ആൾക്കൂട്ടത്തിൽ

നിന്നെ മാത്രം കാണുന്നു.

നിന്നെ നോക്കി വിളിക്കുന്നു: ഒന്നു നിർത്തൂ.

ഉയരെ കറങ്ങുന്നവരിൽ ഞാനെവിടെ

എന്നു മുഖമുയർത്തി നോക്കുകയാണു നീ.

ഒരു യന്ത്രയൂഞ്ഞാലു കണ്ടിട്ടു തന്നെ

എത്ര കാലമായി!

ടിക്കറ്റുകൊടുത്ത് ആളെക്കേറ്റി

ഊഞ്ഞാലു കറക്കി വിടുന്ന

പണിക്കാരൻ്റെ മട്ടുണ്ട്

ടെറസിനോടു ചേർന്ന ഈ ഒറ്റമരത്തിന്.

....

താഴേക്കിറങ്ങുന്ന ഒരെസ്കലേറ്ററിൽ

കാലെടുത്തു വെയ്ക്കേ

അടിതെറ്റി

കൈയിലുള്ള പെട്ടിയോടു കൂടി

മൂക്കുകുത്തിയുരുണ്ടിറങ്ങി

മുഖമുയർത്തി നോക്കുമ്പോൾ

മുന്നിൽ നീ നിൽക്കുന്നതാണ്

ഞാനൊരിക്കലും കാണാത്ത

എപ്പോഴും കണ്ടു കൊണ്ടിരിക്കുന്ന

സ്വപ്നം.