ഗൈറോയിർ ഏലിയാസ്സൻ കവിതകൾ (ഐസ് ലാൻ്റ്, ജനനം: 1961)

I

മലകയറ്റം

ചൊവ്വയിലെ ഏറ്റവും ഉയരം കൂടിയ

പർവതത്തിന്

24 കി.മീ. ഉയരം.

എന്റെ സ്വപ്നങ്ങളിൽ

ഞാനതിൽ കേറിയിട്ടുണ്ട്.

ഓർക്കുന്നു

കൊടുമുടിയിൽ നിന്നുള്ള കാഴ്ച:

പ്രൗഢഗംഭീരം

അന്തി വെളിച്ചത്തുടുപ്പിൽ

നീലഗ്രഹം നീന്തുന്നു.

ഓർമ്മ വരുന്നു

ലൂയി ആംസ്ട്രോങ്ങുമുണ്ടായിരുന്നു

എന്റെ കൂടെ.

അല്ല. ലാൻസ് ആംസ്ട്രോങ്.

അല്ലല്ല, നീൽ ആംസ്ട്രോങ്ങിനെയാണ്

ഞാനുദ്ദേശിച്ചത്.

ഉണർന്നപ്പോൾ

കാലിൽ അതേ ബൂട്ട്.

ചുവന്ന കളിമണ്ണു പുതഞ്ഞ്.

ഞാനതുരച്ചെടുത്ത്

ഒരു കൊച്ചു ചന്ദ്രനിൽ തിരുകി സൂക്ഷിച്ചു.

2

സൂര്യവെളിച്ചം വീഴുന്നിടം,

രണ്ടു സൂര്യന്മാരും

കറുത്ത ചെടികളുമുള്ള ഗ്രഹങ്ങളുണ്ട്.

രണ്ടു സൂര്യന്മാരും

രാക്കറുപ്പു ചെടികളുമുണ്ടെങ്കിലും

അവിടെ യുദ്ധമില്ല.

ഇവിടെ

ഒറ്റസ്സൂര്യൻ

ചെടിയെല്ലാം പച്ച

എന്നിട്ടും സമാധാനമില്ല.

രണ്ടു സൂര്യന്മാരുള്ള ഗ്രഹത്തിൽ

വെളുത്ത കുട്ടിക്കുതിരകൾ

കാട്ടുചെടികൾക്കിടയിലൂടോടുന്നു.

എടുത്തു മാറ്റാൻ പറ്റാത്ത

ഒരേയൊരു സൂര്യൻ മാത്രമുള്ള ഇവിടെ

ടാങ്കുകൾ

കാടുമുറിച്ചു കടന്നു പോകുന്നു.