ചില്ലു പേപ്പർവെയ്റ്റിനകത്തെ
സ്വപ്നലോകത്തു നിന്ന്
കഷ്ടപ്പെട്ടു പൊട്ടിച്ചു പുറത്തെടുത്തപ്പോൾ
കുഞ്ഞു കൊട്ടാരത്തിൻ്റെ
മുഖം മങ്ങി.
എല്ലാ വീടും പോലെ
താനും ഇനി
പൊടിയിൽ കുളിക്കും എന്നോർത്ത്.
ഏയ്,
ഈ കുഞ്ഞിക്കൈയ്യിലിരിക്കേ
നീയെങ്ങനെ പൊടിപിടിക്കാനാണ്!
പോരെങ്കിൽ
ഈ കുഞ്ഞിക്കൈ
ഒരു പച്ചമരത്തിൻ്റെ ചിത്രം
വരക്കാൻ പോവുകയാണ്.
അതിൻ്റെ കാപ്പിനിറത്തടിയിൽ
കടും കാപ്പി നിറത്തിൽ
ഒരു പൊത്തുണ്ടാവും.
ആ പൊത്തിലാണ്
നിന്നെ വയ്ക്കുക
കിളിക്കുഞ്ഞുങ്ങൾ
കൊട്ടാരത്തിൽ
രാജകുമാരന്മാരും രാജകുമാരിമാരുമായി
വളർന്നു പറക്കട്ടെ.
No comments:
Post a Comment