രാത്രി കാറോടിക്കുമ്പോൾ - ഡിക് അലൻ (പരിഭാഷ, യു.എസ്.എ,1939 -2017)

കാറിൻ്റെ തണുത്തതാം സ്റ്റിയറിങ്ങിന്മേൽ തൻ്റെ

തണുത്ത കൈകൾ ചേർത്തുവെച്ചയാളോടിക്കുന്നു.

മുന്നിൽ വാഹനവ്യൂഹം വളഞ്ഞേയൊഴുകുന്നു

പിൻവിളക്കുകളുടെ നീൾനിര കാണുന്നയാൾ.

ഓർക്കുന്നു, പറയാറുണ്ടച്ഛനെപ്പൊഴു,മവ

പൂച്ചക്കണ്ണുകളെന്ന്,പിറകിൽ നിന്നും നോക്കേ,

ദൂരത്തു നിന്നും നിരീക്ഷിക്കും പൂച്ചകളുടെ

നീണ്ടൊരു നിരയെന്ന് - കുട്ടികൾ, പ്രണയികൾ

ഏകാന്തരാകും ബിസിനസ്സുകാ,രവരുടെ

തലകൾ നിറഞ്ഞ ഫോർഡല്ലവ, ഷെവർലേയും

ബ്യൂക്കുമല്ലവ,യിരുട്ടത്തു കൺതിളങ്ങുന്ന

പൂച്ചകൾ,പോകെപ്പോകെ,ത്തെല്ലൊരുമയക്കത്തിൽ

അച്ഛനാപ്പറഞ്ഞതു സത്യമെന്നോരുന്നയാൾ.

ചിലപ്പോൾ കളവായിപ്പറഞ്ഞതാവാമച്ഛൻ,

എന്നിരിക്കിലും നുണയൊക്കെയും യഥാർത്ഥത്തിൽ

നുണകളല്ല, മുന്നിൽക്കാണുന്ന പൂച്ചക്കൺകൾ

ലോകത്തെയരികത്തേക്കണയ്ക്കും ബിംബങ്ങളാം.

- 1987