മരണപ്പെട്ട പ്രിയർക്ക് - ഏണസ്റ്റോ കാർദെനൽ (നിക്കരാഗ്വ, ജനനം: 1925)

സ്ഥാനക്കയറ്റം ലഭിച്ചാൽ, താങ്കൾക്കു

സ്ഥാനമാനങ്ങൾ കിടച്ചാൽ

വമ്പനവാർഡു ലഭിച്ചാൽ

ചിന്തിയ്ക്ക മൃതരെക്കുറിച്ച്.

താങ്കൾ വരവേൽക്കപ്പെടുമ്പോൾ,

പ്രതിനിധി സംഘാംഗമായിരിക്കുമ്പോൾ

ചിന്തിയ്ക്ക മൃതരെക്കുറിച്ച്.

വോട്ടെടുപ്പിൽ ജയിക്കുമ്പോൾ, ജനം

ഹർഷാരവം മുഴക്കുമ്പോൾ

ചിന്തിയ്ക്ക മൃതരെക്കുറിച്ച്

പിന്നെ പ്രസംഗപീഠത്തിൽ

നേതാക്കളോടൊത്തു കേറി

സന്തുഷ്ടനാകുന്ന നേരം

ചിന്തിയ്ക്ക മൃതരെക്കുറിച്ച്.

വൻ പട്ടണത്തിലെ വിമാന -

ത്താവളത്തിൽ നിങ്ങളെത്തേ

ചിന്തിയ്ക്ക മൃതരെക്കുറിച്ച്

മൈക്കിന്നു മുന്നിലായ് നിന്ന്

നേരേ നിവർന്നു പറയാൻ

താങ്കൾതന്നൂഴമെത്തുമ്പോൾ

ചിന്തിയ്ക്ക മൃതരെക്കുറിച്ച്

ചാനലിൻ കണ്ണുകളെല്ലാം

താങ്കളെയൊപ്പി നിൽക്കുമ്പോൾ

ചിന്തിയ്ക്ക മൃതരെക്കുറിച്ച്

ഉത്തരവിറക്കാൻ അനുവാദമേകാൻ

സർട്ടിഫിക്കറ്റുകൾ നൽകാൻ

അധികാരി താങ്കളാകുമ്പോൾ

ചിന്തിയ്ക്ക മൃതരെക്കുറിച്ച്

കൂനിപ്പിടിച്ചൊരു വൃദ്ധ

താങ്കൾക്കരികത്തു വന്ന്

ഒരു തുണ്ടു മണ്ണിനെച്ചൊല്ലി

ആവലാതിപ്പെടുംനേരം

ചിന്തിയ്ക്ക മൃതരെക്കുറിച്ച്.

ചിന്തിയ്ക്ക മൃതരെക്കുറിച്ച് - കാണൂ

കുപ്പായമില്ലാതവരെ

വലിച്ചിഴയ്ക്കപ്പെട്ട്, ചോര ചീറ്റിക്കൊണ്ട്

തല മൂടി, തുണ്ടു തുണ്ടായി,

വെള്ളത്തിൽ മുങ്ങി,ക്കറന്റടിയേറ്റ്, കൺ

ചൂഴ്ന്നെടുത്ത്, കഴുത്തറ്റ്

വെടിയുണ്ട കീറിപ്പൊളിച്ച്, പാത -

വക്കത്തു കൊണ്ടിടപ്പെട്ട്,

അവർ തീർത്ത കുഴികളിൽത്തന്നെ

ഒന്നിച്ചടക്കി മണ്ണിട്ട്,

അല്ലെങ്കിൽ കാട്ടുചെടികൾ

ആർത്തു തഴച്ചു വളരാൻ

പുഷ്ടിയേറ്റും വിധം മണ്ണിൽ

ചുമ്മാ കിടക്കുന്നതായി.

മരണമടഞ്ഞോരവർതൻ

പ്രതിനിധിയാണിന്നു താങ്കൾ

ചുമതലയേൽപ്പിച്ചിരിക്കു-

ന്നവർ താങ്കളെയതിന്നായി.