ഹൊസേ എമിലിയോ പച്ചേക്കോ കവിതകൾ (മെക്സിക്കോ, സ്പാനിഷ്, 1939 - 2014)

1

ചരിത്രക്കുതിപ്പ്

ചില വാക്കുകൾ ഞാനെഴുതുന്നു.

ഞൊടിയിട കൊണ്ടവ

വ്യത്യസ്തമായ വേറെന്തോ

വ്യഞ്ജിപ്പിക്കുന്നു.

വ്യത്യസ്തമായൊരു ഗൂഢോദ്ദേശ്യം

സൂചിപ്പിക്കുന്നു.

കാർബൺ 14 പരിശോധനക്കു പാകത്തിൽ

മെരുങ്ങുന്നു, ഇപ്പോളവ.

ഒരതിവിദൂര ജനതയുടെ

പുരാലിഖിതങ്ങൾ

ഇരുട്ടിൽ തിരഞ്ഞുകൊണ്ടിരിക്കുന്നു

എഴുതപ്പെട്ട വാക്കിനെ.

2

കൊടിയ രാജ്യദ്രോഹം.

ഞാനെൻ്റെ രാജ്യത്തെ സ്നേഹിക്കുന്നില്ല

അതിൻ്റെ അമൂർത്തമായ തിളക്കം

എൻ്റെ കൈപ്പിടിയിലൊതുങ്ങാത്തതാണ്.

എന്നാൽ (കേൾക്കാൻ എത്ര മോശമാണെങ്കിലും)

ഇതിലെ പത്തു സ്ഥലങ്ങൾക്കായി

ഞാനെൻ്റെ ജീവൻ വെടിയും.

ചില മനുഷ്യർക്കായി,

തുറമുഖങ്ങൾ, പൈൻമരങ്ങൾ, കോട്ടകൾ,

ഇടിഞ്ഞു വീണൊരു നഗരം,

അതിൻ്റെ ചരിത്രത്തിൽ നിന്നുള്ള

നരച്ച വിചിത്ര രൂപങ്ങൾ

പർവതങ്ങൾ 

എന്നിവക്കായി.

(മൂന്നോ നാലോ നദികൾക്കും)

- 1969