ഹാൻ ദോങ് കവിതകൾ (ചൈന, ജനനം: 1961)

1

കാട്ടുതാറാപ്പെഗോഡ

കാട്ടുതാറാപ്പെഗോഡയെപ്പറ്റി

നമുക്കു ശരിക്കെന്തറിയാം?

ദൂരെ നിന്നു കുറേയാളുകൾ വരുന്നു

കേറാൻ

കേറി, ഹീറോയാകാൻ

ചിലർ പിന്നെയും പിന്നെയും വരുന്നു

സ്വയം തൃപ്തരാവാത്ത മനുഷ്യർ

തടിച്ചുകൊഴുത്തു വളരുന്നവർ

എല്ലാവരും കയറുന്നു

ഹീറോയാകാൻ.

എന്നിട്ടു താഴെയിറങ്ങുന്നു

താഴത്തെ റോഡിലൂടെ നടക്കുന്നു

ഒറ്റക്കണ്ണിമ ചിമ്മലിൽ കാണാതാവുന്നു

ഇരട്ടച്ചങ്കുള്ള ചിലർ താഴേക്കു ചാടും

പടിക്കെട്ടുകളിൽ ചുവന്ന പൂക്കൾ വിരിയും.

ഇതാ, ഇപ്പോൾ ശരിക്കുമൊരു ഹീറോ

നമ്മുടെ കാലത്തിന്റെ ഹീറോ.

കാട്ടുതാറാപ്പെഗോഡയെപ്പറ്റി

ശരിക്കെന്തറിയാം നമുക്ക്?

നാം കയറുന്നു.

ചുറ്റുമുള്ള കാഴ്ചകൾ നോക്കുന്നു.

എന്നിട്ടു താഴെയിറങ്ങുന്നു.

                                   1982

2

മഴ

യാതൊന്നും സംഭവിക്കാതെ പോകുമ്പോൾ

മഴ ഒരു മഹാസംഭവമാകുന്നു.

എന്നാൽ എന്തെങ്കിലുമൊക്കെ സംഭവിക്കുമ്പോൾ

മഴ പശ്ചാത്തലത്തിലേക്കൊതുങ്ങുന്നു.

ചിലരതിനെയോർക്കുന്നു

ചിലരോർക്കുന്നില്ല.

വർഷങ്ങൾക്കു ശേഷം, 

എല്ലാം ഭൂതത്തിലടങ്ങുമ്പോൾ

മഴ

ഒരിക്കൽ കൂടി നമ്മിലേക്കു മടങ്ങിവരുന്നു.

ഒന്നും സംഭവിക്കാത്ത പോലെ

പെയ്തു തിമിർത്ത്.

3

കാണൂ.

നിന്നെക്കാണുന്നു.

അവനെക്കാണുന്നു.

എന്നാൽ നിങ്ങൾക്കു രണ്ടാൾക്കും

പരസ്പരം കാണാനാവുന്നില്ല.

നടുക്കൊരു മതിൽ.

ഒരു മരം.

അല്ലെങ്കിൽ മഞ്ഞ്.

മതിലിനരികെ ഞാൻ.

മരത്തിനു മുകളിൽ ഞാൻ.

മഞ്ഞുതന്നെയാണു ഞാൻ.

എന്നാൽ നിങ്ങൾക്കു രണ്ടാൾക്കും

ഒരേ സമയം എന്നെക്കാണാൻ കഴിയുന്നു.

നിനക്കെന്നെ കാണാനാവുന്നു.

ഇപ്പോളൊന്നു കാണുന്നു.

എന്നിട്ടടുത്തതിലേക്കു തിരിയുന്നു.

ഞാനാണു മതിൽ.

മരം

മഞ്ഞ്.

എന്തും.

രണ്ടാൾക്കും കാണാവുന്നത്.

മറയ്ക്കാവുന്നത്.

ഒരു പക്ഷിയുടെ

രണ്ടു പാർശ്വങ്ങൾ

എൻ്റെ ഇടം കണ്ണ്

വലംകണ്ണിൽ നിന്നു വേർപെടുന്നു.

നിന്നെ കാണുന്നു.

അവനെ കാണുന്നു.

നിങ്ങൾ രണ്ടു പേർക്കും മാത്രം

തമ്മിൽ കാണാനാവുന്നില്ല.

- 1990