സ്നേഹ മാധവൻ - റീസ് (കാനഡ, ഇംഗ്ലീഷ്)

തോപ്പിൽ ഭാസി

സ്നേഹ മാധവൻ - റീസ് (കാനഡ, ഇംഗ്ലീഷ്)

പഴങ്ങളുടെ മലയാളപ്പേരൊന്നുമെനിക്കറിയില്ല
ഇംഗ്ലീഷ് പേര് അദ്ദേഹത്തിനുമറിയില്ല
ആകയാൽ പലതരം പഴങ്ങളുമായി ഞാൻ
കോണികേറിയിറങ്ങി,
അദ്ദേഹത്തിനു സ്ട്രോബറിയാണു വേണ്ടതെന്ന്
ഒടുവിൽ ഞങ്ങൾ കണ്ടെത്തുംവരെ.

ഇന്ത്യയിലദ്ദേഹം പ്രശസ്തൻ.
ഒരു നാടകകൃത്തോ കവിയോ.
ഇത് 1989 ൽ.
എനിക്കന്നു പത്തു വയസ്സ്.
ഇന്ത്യൻ താരങ്ങളെ അറിയാം
- സിനിമക്കാർ, നർത്തകർ
എന്നാൽ ഇതാദ്യമായാണ്
ഒരെഴുത്തുകാരൻ ഞങ്ങളോടൊപ്പം തങ്ങുന്നത്
അച്ഛൻ്റെ ക്ലബ്ബിലെ അതിഥിയായി.

ഉള്ളില്ലാത്ത വെളുത്ത മുടിക്ക്
അദ്ദേഹത്തിൻ്റെ തലയിലെ തവിട്ടുതൊലി
മറയ്ക്കാനായില്ല
കണ്ണുകൾക്കതിരിട്ടു

കറുത്ത കട്ടിക്കണ്ണട

ഒപ്പിട്ടുതരാനായി ഞാൻ ഓട്ടോഗ്രാഫ് നീട്ടി
തൻ്റെ നാട്ടിലെ ലിപിയിൽ അദ്ദേഹം
ഒരു മുഴുവൻ പേജ് എഴുതി നിറച്ചു
ഇളംചുവപ്പു കടലാസിൽ നീലമഷിയിൽ.
അച്ഛനെന്നെ വായിക്കാൻ പഠിപ്പിച്ച
ആ ഉരുണ്ട അക്ഷരങ്ങൾ
അദ്ദേഹത്തിൻ്റെ ഒഴുക്കൻ കയ്യിൽ
നിഗൂഢക്കുരുക്കുകളായി മാറിയിരുന്നു.
മുകളിലെ വരിയേ എനിക്കു വായിക്കാൻ കഴിഞ്ഞുള്ളൂ
എൻ്റെ പേരിൻ്റെ പരിചിതമായ അക്ഷരങ്ങൾ
രണ്ടുവട്ടം അതിലാവർത്തിച്ചിരുന്നു:
സ്നേഹമുള്ള സ്നേഹ മോൾ
തനിക്കു പഴങ്ങൾ കൊണ്ടുതന്ന ഒരു പെൺകുട്ടിക്കായി
മറ്റെന്തെല്ലാമായിരിക്കും അദ്ദേഹം ആ പേജിൽ
എഴുതി നിറച്ചിരിക്കുക!