1
മഴമനുഷ്യൻ
മഴമനുഷ്യൻ മരിച്ചു കിടക്കുന്നു
ജീർണ്ണിച്ച ഇലനിലത്ത്
മേഘവീടുകളുടെ അവശിഷ്ടങ്ങളിൽ
കൂടുകെട്ടാൻ വരുന്ന കിളികൾ മാത്രമാവണം
അതു ശ്രദ്ധിച്ചിട്ടുണ്ടാവുക
ജീർണ്ണിച്ച ഇലനിലത്ത് മരിച്ചു കിടക്കുന്നു
മഴമനുഷ്യൻ
2
മേഘം ഒരാനയെ ഉണ്ടാക്കി
മേഘം ഒരാനയെ ഉണ്ടാക്കി
ആന ഒരു മുയലിനെയുണ്ടാക്കി
മുയലിൻ്റെ ചെവികളിൽ നിന്നു പർവ്വതങ്ങൾ വന്നു
പർവ്വതങ്ങൾ ഒരു ഗർഭിണിക്കൊടിച്ചിയുടെ മുലക്കണ്ണുകളായി
ഗർഭിണിക്കൊടിച്ചിയുടെ മുലക്കണ്ണുകളിൽ നിന്നു മഴ പെയ്തു.
3
നിൻ്റെ കണ്ണുകളുടെ കാട്ടിൽ
നിൻ്റെ കണ്ണുകളുടെ കാട്ടിൽ
രാത്രി മാത്രം കാണുന്നു
പുള്ളിപ്പുലിയുടെ രാത്രിയിൽ
കണ്ണുകൾ മാത്രം കാണുന്നു
രാത്രിയുടെ ഉദയത്തിൽ നിൻ്റെ
കണ്ണുകൾ മാത്രം കാണുന്നു.
നിൻ്റെ പുള്ളിപ്പുലിക്കണ്ണുകളിലോ
കാടു മാത്രം കാണുന്നു.
No comments:
Post a Comment