പടലം 45

പടലം 45

1
അവനും പോർക്കളത്തിൽ വീണേയവയവങ്ങളും ചിതറി-
യതു കേട്ടിട്ടുലകമൂഞ്ഞാലാടും വൻ പടയോടൊപ്പം
അവനിനായകരെ വെല്ലാനടുത്തവരേഴും വീണു
കപികളാൽ വലിയ പോരിൽ രാമൻ്റെയനുജനാലും

2
അനുജന്മാർ രണ്ടാളെൻ്റെ തനയന്മാർ നാലാൾ പിന്നെ
പടയാളിമാരാം രണ്ടാൾ യമപുരി വേഗം പൂകീ
മുടിയും ശത്രുക്കളിതിലൊരുത്തൻ കോപിച്ചാലെന്നാൽ
മനുജാധിപന്മാർ വമ്പർ, വാനരവരന്മാരും

3
വരമുള്ളസ്ത്രത്തിനാലേ വാനരകുലത്തെ വീഴ്ത്തി
ഒരിക്കലൊരിരവിലെൻ്റെ തനയനാമിന്ദ്രജിത്ത്
ശരനിരപൊഴിച്ചു രാമലക്ഷ്മണന്മാർ തൻ മെയ്യു
കരവിരലൂന്നുവാനും പഴുതില്ലാതായ്ച്ചമച്ചൂ

4
ചമയത്തോടൊപ്പം പ്രാണൻ കളഞ്ഞവർ ഭൂവിൽ വീണു
നമുക്കല്ലോ വിജയമെന്നു കരുതി നാം കളമൊഴിഞ്ഞു
ഇമയ്ക്കും മുമ്പവരുണർന്നാർത്തെഴുനേറ്റെട്ടു മടങ്ങു
തിമർപ്പോടെ യുദ്ധം ചെയ്തൂ ചെറുക്കുന്നോർ മുടിയുമാറ്

5
മുടിയുമാറായ് മുടിഞ്ഞൂ മുഴുവനീ നിശാചരന്മാർ
കൊടിയ വാനരവരന്മാർ കൊന്നുകൊന്നൊടുക്കയാലേ
അടരിലസ്ത്രത്താൽ ദാശരഥികൾക്കും വാനരർക്കും
ഇടർ തീർക്കാൻ കഴിവുള്ളോരായ് എനക്കിനിയാരുമില്ലേ

6
ഇല്ലാതായൊടുങ്ങീ പോരിലിളയവർ, തനയന്മാരും
നല്ലവർ മറ്റുള്ളോരും നമുക്കിനിയരുതു വെല്ലാൻ
വല്ലതുമായ്ക്കൊള്ളട്ടെ, ശത്രുക്കളെത്തടുക്കാൻ
നില്ലു നില്ലരക്കർ ചുറ്റുമെല്ലാ വഴികൾ തോറും

7
വഴികളിലെങ്ങും ചുറ്റു കിടങ്ങിലും കരുത്തുള്ളോരു
പടയെ നിറുത്തിയെങ്ങും നിരന്തരം നഗരം കാക്കാൻ
എതിരാളിക്കൂട്ടത്തിൻ്റെ വമ്പു പൊറുക്കാൻ വയ്യാ
എതിർക്കാൻ പറ്റുന്നോർ നിൽക്ക മൈതിലിയിരിക്കുന്നേടം

8
ഇരിക്കുവാൻ വിഷമമാകും വിധമെരിപൊരി കൊള്ളുന്നൂ
തരിപ്പും പോർക്കരുത്തുമുള്ള തനയന്മാർ മുടിയുകയാൽ
പെരുത്ത ദുഃഖത്താലോരോന്നുരച്ചു ലങ്കേശനേറെ-
യരിശത്തോടകവും വെന്തു കോയിലകത്തു വന്നു

9
അകത്തുവന്നുടനേ മെത്തപ്പുറത്തു കമിഴ്ന്നു വീഴ്കേ -
യടുത്തെത്തിക്കൈയ്യാലടിയിണ നന്നായ് തൊഴുതുകൊണ്ടു
അടരിന്നടവൊക്കേയുമറിയുന്നോൻ ശത്രുക്കളാ -
മിരുളിന്നു സൂര്യനായോരിന്ദ്രജിത്തിതു മൊഴിഞ്ഞു

10
മൊഴിഞ്ഞിതു നിശിചരന്മാർ മുന്നമേ പലതുമെന്നാൽ
തകർന്നിടും മനുജാധിപർ കപികളും ഞാനെതിർത്താൽ
അടിയനൊന്നുരചെയ്യുന്നൂ താണുകേണവിടുന്നിൻ പൊൻ -
കഴലിണയാണയിട്ടേ ചെയ് വതുമിരിപ്പതും ഞാൻ