പടലം 43

പടലം 43

1
അതികായനുണർന്നു കണ്ണിൽ പൊടിഞ്ഞ ചെഞ്ചോര കയ്യാൽ
തുടച്ചു ലക്ഷ്മണൻ തന്നെ നന്നായ് ബഹുമാനിച്ചു
എതിരേ ചെന്നെയ്തമ്പുകൾ ഇരുപതും നാലുമഞ്ചും
പതിനാറുമേഴും മൂന്നും പതിനഞ്ചും രണ്ടുമൊന്നും

2
ഒന്നുമങ്ങണയും മുന്നേയുടനുടൻ ശരങ്ങളാലേ
വന്നോരമ്പുകളെല്ലാം വരുംവഴി മുറിച്ചു വീഴ്ത്തി
നിന്ന ലക്ഷ്മണനെയെയ്തൂ നിശിചരൻ വേഗമൊന്നു
ചെന്നവൻ തൻ്റെ മാറിൽ ചിക്കെന്നു തറച്ചിതമ്പും

3
അമ്പു പാഞ്ഞണകേ ചോരയണിഞ്ഞവൻ മദം പൊഴിച്ചു
കമ്പം പിടിച്ചൊരാന പോലേ പടക്കളത്തിൽ
അംബരമൂഴിയും സമുദ്രവും നടുങ്ങുംവണ്ണം
വൻപുകഴ് ലക്ഷ്മണനും പള്ളിയമ്പുടനെടുത്തു

4
എടുത്തു പാവകനെന്നു പേരുള്ളസ്ത്രം തൊടുത്തു
തിടുക്കത്തിൽ വലിച്ചു ബാലൻ ലക്ഷ്മണൻ വിടുന്ന നേരം
തടുത്തതികായൻ തിരിച്ചെയ്തൂ സമീരണാസ്ത്രം
അടുത്തു തമ്മിലുരഞ്ഞു വെണ്ണീറായ് വീണൂ രണ്ടും

5
രണ്ടും മുടിഞ്ഞുകണ്ടങ്ങിടയിലൈഷികമെന്ന
വമ്പുള്ളസ്ത്രം തൊടുത്തു ദേവവിരോധിയെയ്തു
പുരന്ദരാസ്ത്രത്താലതിൻ കരുത്തിനെപ്പൊരുതടക്കി
ചൊരിഞ്ഞൂ കണകളാലേ പൊടുപൊടേ മനുജാധിപൻ

6
മനുജാധിപൻ തൊടുത്ത ബാണങ്ങളതികായൻമേൽ
മുന ചെന്നു തറക്കുകില്ലാ കാരണമതിനുണ്ടൊന്ന്
കനത്തോരു വരമുൾച്ചേർന്ന കവചമുണ്ടവനതൊന്നേ
തനിബലമടരിൽ ശത്രു സായകാവലി തടുക്കാൻ

7
സായകാവലി പൊഴിഞ്ഞു തളർന്നു വലഞ്ഞരക്കൻ
മായമായ് മുടിയാനാണോ വന്നതിന്നിവിടെയെന്നു
തെളിവോടെ നിനച്ചു പോരു തുടങ്ങിയസ്ത്രം തൊടുത്ത
ലക്ഷ്മണനോടു വായുഭഗവാൻ വന്നു പറഞ്ഞു

8
പറയാം ഞാനതികായൻ്റെ നാശത്തെപ്പറ്റി,പ്പോരിൽ
കഴിവവൻ കാണിച്ചതു കവചത്തിൻ വമ്പാലല്ലോ
വലിയ നാശം മറ്റുള്ള ശരങ്ങൾക്കു പറ്റീ,യതിനാൽ
അഴകോടേ തൊടുത്തീടുക ബ്രഹ്മാസ്ത്രം വേഗമെന്നായ്

9
എന്നിതു പവനൻ വന്നു പറയവേ ലക്ഷ്മണനും
ചെന്നു കൈതൊഴുതു രാമദേവൻ്റെ തൃക്കാൽ രണ്ടും
ചിത്തത്തിലുറപ്പിച്ചങ്ങു നിറുത്തിയതിനുശേഷം
ബ്രഹ്മാവിൻ വിജയാസ്ത്രത്തെ വീരകേസരി തൊടുത്തു

10
തൊടുത്തപ്പോളെരിഞ്ഞൂ വാനം ചുവന്നൂ ദിശകളൊക്കെ
തിടുക്കത്തിൽ കലങ്ങീയാഴി, ചലിച്ചൂ മാമലകളെല്ലാം
എടുത്തു പായ് തെറുക്കുംപോലേ ഹിരണ്യൻ തെറുത്തു കാതി -
ലടക്കിയ ധരണിയെല്ലാമധികമായിളകീയെങ്ങും

11
ഇളകും കരങ്ങൾ രണ്ടിലിടത്തേതു നിവരെപ്പൊങ്ങീ
ചെവിയേക്കാൾ വലത്തേക്കയ്യു മടമ്പോളം താഴുംവണ്ണം
അളവുകണ്ടരക്കൻകണ്ഠമുന്നം പിടിച്ചിട്ടസ്ത്രം
തൊടുത്തൂ ലക്ഷ്മണനാർത്തങ്ങിടിയൊലി പതറുമാറ്