മടങ്ങിവരവ്
ജോവോ പെദ്രോ (അംഗോള, പോർച്ചുഗീസ് ജനനം: 1948)
കാമറാഡ തൻ്റെ ഗ്രാമത്തിലെത്തി
(യുദ്ധം കഴിഞ്ഞിരുന്നു)
കാമറാഡ തൻ്റെ ഗ്രാമത്തിൽ തിരിച്ചെത്തി
യുദ്ധത്തിനും ചെറുത്തുനില്പിനും ശേഷം
തളർന്ന്
അക്രമത്തിൻ്റെ നാളുകളോർക്കുമ്പോൾ
അയാൾക്ക് വായിലൊരുപ്പു ചുവ
അയാൾ സംസാരിക്കാൻ ആഗ്രഹിച്ചു
എന്നാൽ മൗനം മാത്രം
യുദ്ധത്തിനിടയിലെ ഇത്തിരിശ്ശാന്തതയിൽ
പുൽപ്പരപ്പിൽ വിശ്രമിക്കുമ്പോൾ
സ്വപ്നം കാണാറുണ്ടായിരുന്ന
തൻ്റെ ഗ്രാമമായിരുന്നില്ല
ഇപ്പോൾ അയാൾ കാണുന്ന തൻ്റെ ഗ്രാമം
- ഇത് തൻ്റെ ഗ്രാമം മാത്രം, മറ്റൊന്നുമല്ല
ബസ്സിൽ വീട്ടിലേക്കു വരുമ്പോൾ
ചുറ്റുമുള്ള ആണുങ്ങളുടെ കണ്ണുകളിലയാൾ നോക്കി
ചുറ്റുമുള്ള പെണ്ണുങ്ങളുടെ മുഖങ്ങളിലയാൾ നോക്കി
അയാൾ വിങ്ങിച്ചുമച്ചു
ടിക്കറ്റെടുത്തു
മറ്റെല്ലാവരെയും പോലെത്തന്നെയായിരുന്നു
കാമറാഡ
ആരുമയാളെ തിരിച്ചറിഞ്ഞില്ല
ആരുമയാളെ ശ്രദ്ധിച്ചില്ല
കാമറാഡ വീട്ടിലെത്തി
വാതിൽമുട്ടി
കാത്തുനിന്നു
("ഇതാവരുന്നു, ഒരു നിമിഷം.... കാമറാഡാ ...")
കുടുംബത്തെ കണ്ടു
കരഞ്ഞു അയാൾ
വായിലൊരു ഉപ്പു ചുവ
യുദ്ധം കഴിഞ്ഞയാൾ വീട്ടിലെത്തിയിരിക്കുന്നു
അയാൾ മരിച്ചിട്ടുണ്ടായിരുന്നില്ല
"ഞാൻ വീട്ടിലെത്തി"
അത്രയേ പറഞ്ഞുള്ളൂ
കാമറാഡ തളർന്ന്
കിടക്കയിൽ കിടപ്പായി
യുദ്ധം കഴിഞ്ഞിരുന്നില്ല.
No comments:
Post a Comment