ബാൽക്കണിയിൽ നിന്നൊരു സിംഫണി
ജാറെഡ് ആങ്കിറ (കെനിയ, ജനനം: 1947)
ചിലനേരം ഞാൻ ബാൽക്കണിയിലിരുന്ന്
ലോകത്തിലെ നദികൾ
കടലാഴങ്ങൾക്കരികിൽ അക്ഷമയോടെ കാത്തിരിക്കുന്ന
പല പെരുംതുരുത്തുകൾക്കിടയിലൂടെ
താഴേക്കൊഴുകുന്നതു നോക്കിക്കാണുന്നു
ചിലനേരം ഞാൻ കാണുന്നു
വായുവിന്നിളം കിളികൾ
ജീവിക്കാനായി പെറ്റോരെ വിട്ട്
ലോകത്തിനു നേർക്ക്
ഇണയിണയായ് പോകുന്നത്
സമാധാനത്തിനാഗ്രഹിക്കുമ്പോൾ
ചിറകെത്ര കുഴഞ്ഞാലും മരത്തിന്മേലിറങ്ങില്ലെന്നു
നന്നായറിയാവുന്ന കാടക്കിളികൾക്കൊപ്പം
മനസ്സു ചുറ്റിത്തിരിയുന്നു
ആകയാൽ ഞാൻ സ്വരുക്കൂട്ടുന്നു
ഭൂപ്പരപ്പിൽ നദികളെന്നപോലെ ചിതറിയ
എൻ്റെ വ്യക്തിത്വങ്ങൾ
അവയിലെ ജലം
കടലിലെത്തണമെന്ന ആഗ്രഹത്തോടെ
നാമെല്ലാവരും ആശിക്കുന്നു
ഈ യാത്രകൾക്കു ശേഷം
ചിതറിയ വികാരങ്ങളെല്ലാം
ആ ഇരുണ്ട സമുദ്രത്തിലൊത്തുചേരുമെന്ന്
No comments:
Post a Comment