നഗരം ഒരു തകർന്ന കപ്പൽ
അമാൽ ഡാങ്കുൽ (ഈജിപ്ത്, 1940 - 1982)
ഈ രാത്രി ഞാൻ തനിച്ചായപോലെ.
നഗരം ഒരു തകർന്ന കപ്പൽ,
അതിൻ്റെ പ്രേതങ്ങളോടും
ഉയർന്ന കെട്ടിടങ്ങളോടും കൂടി.
പണ്ടെന്നോ കടൽക്കൊള്ളക്കാർ കൊള്ളയടിച്ച ശേഷം
കടലിനടിത്തട്ടിലേക്കു താഴ്ത്തിയ കപ്പൽ
അന്ന് കപ്പിത്താൻ കൈവരിക്കു മുകളിലൂടെ
തല പുറത്തിട്ടു നോക്കിയപ്പോൾ
കാൽക്കീഴിൽ കണ്ട
പൊട്ടിയ വീഞ്ഞുകുപ്പി
അമൂല്യമായ ലോഹക്കഷണങ്ങൾ
നിശ്ശബ്ദമായ പാമരങ്ങളിൽ
പിടിച്ചൊട്ടി നിൽക്കുന്ന നാവികർ
അവരുടെ കീറിപ്പറിഞ്ഞ വസ്ത്രങ്ങൾക്കിടയിലൂടെ
നീന്തിയ
ഓർമ്മയുടെ വിഷാദമത്സ്യം
നിശ്ശബ്ദ കഠാരകൾ
വളർന്നു പെരുകുന്ന പായൽ
കൊട്ടക്കണക്കിനു പൂച്ചശ്ശവങ്ങൾ
ഒന്നും മിടിക്കുന്നില്ല
ഈ ഇണങ്ങിയ ലോകത്ത്
No comments:
Post a Comment