ഗ്രാമസംഗീതം - പി.രാമൻ

ഇന്നു രാവിലെത്തൊട്ട്
യന്ത്രവാൾ
മരങ്ങളിൽ കയറിയിറങ്ങുന്ന
സംഗീതമാണീ
ഗ്രാമത്തിന്റെ സംഗീതം,കേൾക്കാം.
ഇടയ്ക്കു കാറ്റിൽ മാഞ്ഞു,മിടയ്ക്കു മുറുകിയും
മണ്ണിലും
വെള്ളത്തിലും മാനത്തുമീർന്നീടുന്നു.

ഉലഞ്ഞു തലതല്ലിപ്പതിക്കും ചില്ലപ്പറ്റം,
മുറിഞ്ഞു വീഴും പെരുംതടിതൻ
ധോം ധോം കാരം,
തുഞ്ചത്തെയിലയുടെ ഞെരമ്പും പിടയ്ക്കുന്ന -
തെന്തിനെന്നറിയാതെപ്പകച്ച കിളിയൊച്ച,
കിളികൾ പാറിപ്പോയ കൂട്ടിലെച്ചെറുമുട്ട -
ക്കകത്തു മുഴങ്ങിക്കൊണ്ടിരിക്കും
ഘനവാദ്യം.

നിറുത്തീ പെട്ടെന്നുച്ചസ്ഥായിയിലാ വാൾപ്പാട്ട്,
നിലതെറ്റി വീഴാനായായുന്നു നാടപ്പാടെ.