ഇതു പോലെ- പി.രാമൻ

പാതിരക്ക്

തന്നെ കടിച്ചുണർത്തിയ ഉറുമ്പുകളെ

കിടക്കയിൽ പരതിപ്പരതി

നേരം വെളുപ്പിക്കുമായിരുന്നു

അച്ഛൻ.

ഞാനെത്രയോ തവണ കണ്ടിട്ടുണ്ട്.

ആ കിടക്കയിൽ

തങ്ങളുണ്ടായിരുന്നില്ല എന്ന

അച്ഛനറിയാത്ത സത്യം

വർഷങ്ങൾ കഴിഞ്ഞ്

ഉറുമ്പുകൾ ഇന്നെന്നോടു വെളിപ്പെടുത്തി

ഞാനുണർന്നു പരതുന്നതിനിടയിൽ.

കടിച്ചുണർത്തീട്ടു

കളവും പറയുന്നോ?

ഇവിടെ ഇപ്പോൾ നിങ്ങളില്ലെന്ന 

ഞാനറിയാത്ത സത്യം

ഞാനില്ലാതായി കുറേക്കഴിഞ്ഞ്

ഇതുപോലെ നിങ്ങൾ

വെളിപ്പെടുത്തുമല്ലോ അല്ലേ?