കവിതകൾ
അഡ സാലസ് (സ്പെയിൻ, ജനനം: 1965)
1
ഇതൊരു പാറ
ഇതു നിരീക്ഷിക്കുന്നു
മേഘങ്ങളുടെ അലസഗമനം
ചില്ലകളുടെ വളവുകൾ
പക്ഷിയുടെ
അസാദ്ധ്യ ജ്യാമിതി
ഇതൊരു പാറ
നിശ്ശബ്ദം ഇതു നിരീക്ഷിക്കുന്നു
ചലനത്തിൻ്റെ രഹസ്യ വഞ്ചന
2
നിനക്കെന്നോടെന്തെല്ലാമോ
പറയാനുണ്ടെന്നെനിക്കറിയാം, ലോകമേ,
ഞാനെല്ലാം വൃത്തിയാക്കാൻ പോകയാണ്, അങ്ങനെ
എല്ലാം കൂടുതൽ സുതാര്യമാകട്ടെ
ഭയമോ യത്നമോ കൂടാതെ
നിൻ്റെ മന്ത്രണങ്ങൾ എനിക്കു കേൾക്കാൻ കഴിയട്ടെ
ഇപ്പോൾ നിനക്കെൻ്റെ കാതരികിൽ വരാം
മെല്ലെ സംസാരിക്കാം
വളരെ മെല്ലെ
ധൃതികൂട്ടാതെ
മരണം നമ്മെ
ഒരിക്കലും തൊടാത്ത വിധം,
ലോകമേ....
No comments:
Post a Comment