കാല്പടങ്ങൾ

 കാല്പടങ്ങൾ

ഞങ്ങളിൽ നിന്ന്
ഈ ഭാരം വെട്ടി മാറ്റിയാൽ
ഞങ്ങൾ ആനന്ദനൃത്തം ചവിട്ടും
എന്നു പുകയുന്നു എൻ്റെ കാൽപ്പടങ്ങൾ

ഇതാ ഇവിടെ വെട്ടൂ എന്ന്
കടഞ്ഞു കാണിച്ചു തരുന്നു
കാല്പടങ്ങൾക്കു തൊട്ടു മുകളിൽ വെച്ചു
കാൽവണ്ണ

വെട്ടിമാറ്റുകയാണ്
എന്നവ വിചാരിക്കുന്നു
പക്ഷേ ഞാനവ തലോടുന്നു

വയസ്സാകൽ :
കാൽമുട്ടിനു താഴേക്ക്
അമർത്തിത്തിരുമ്മുന്ന സുഖമറിഞ്ഞ്
നീട്ടിനീട്ടിവയ്ക്കൽ

ഒരു മൃതദേഹത്തിലെ
ഏറ്റവും അന്തസ്സുള്ള അവയവം
എഴുന്നു നിൽക്കുന്ന കാല്പടങ്ങൾ തന്നെ
ശിരസ്സുപോലും അതിനു താഴെയേ വരൂ

കാരണം ശരീരം പിന്നിൽ തള്ളി
പോകണം
മുമ്പോട്ട് അതോ മുകളിലേക്കോ?
തള്ളവിരലുകൾ ചേർത്തു കെട്ടിവെച്ചാലും