യുദ്ധമില്ലെങ്കിൽ
മമ്മാദ് അരാസ് (അസർബൈജാൻ,1933-2004, ഭാഷ അസേരി)യുദ്ധമില്ലെങ്കിൽ
ആയുധങ്ങൾ തുറന്ന ഉലയിലിട്ടുരുക്കി
ഭൂമിക്കും ചൊവ്വക്കും ഇടയിലൊരു പാലം പണിയാൻ
നമുക്കു കഴിയും
യുദ്ധമില്ലെങ്കിൽ
ആയിരം കൊല്ലത്തെ വിളവ്
ഒറ്റ ദിവസം കൊണ്ടു കൊയ്യാൻ നമുക്കാവും
ചന്ദ്രനേയും നക്ഷത്രങ്ങളേയും
ഭൂമിയിലേക്കു കൊണ്ടുവരാൻ
ശാസ്ത്രജ്ഞർക്കു കഴിയും
പടത്തലവൻ്റെ കണ്ണുകൾ പറയുന്നു:
"ഒരു ചെറുഗ്രാമത്തിൻ്റെ മേൽനോട്ടക്കാരനാകും ഞാൻ
യുദ്ധമില്ലെങ്കിൽ!"
യുദ്ധമില്ലെങ്കിൽ
അകാലമരണങ്ങൾ ഒഴിവാക്കാം
മുടി നരക്കുന്നത് ഏറെ വൈകിക്കാം
യുദ്ധമില്ലെങ്കിൽ നാം ദുഃഖമറിയില്ല, വേർപാടറിയില്ല
യുദ്ധമില്ലെങ്കിൽ
മനുഷ്യകുലത്തിൻ്റെ വെടിയുണ്ട
വാക്കായി മാറും
വാക്കോ സ്നേഹമായും.
No comments:
Post a Comment