രാമചരിതം പടലം 10

രാമചരിതം പടലം 10

1
കടലും കടന്നു ചെന്ന പടയുടെ പെരുപ്പം കണ്ടു
വേഗം വന്നറിയിക്കെന്നു കേമൻ രാവണൻ ചൊൽകേ
കപിവരരൂപം പൂണ്ടു ശുകസാരണന്മാരങ്ങു
തരം നോക്കി നടക്കേക്കണ്ടു തടുത്തൂ വിഭീഷണനും.

2
കപിവീരർ വേഗം ചെന്നു പാഞ്ഞുടൻ പിടിച്ചടിച്ചു 
കാൽകളും കയ്യും കെട്ടി രാമന്റെ മുന്നിലിട്ടു.
"ദശമുഖൻ വാക്കാൽ മെല്ലെപ്പോന്നു വൻപടയെക്കാണാൻ
കയറീയിത്തറയിൽ ഞങ്ങൾ" ശാന്തരായവർ പറഞ്ഞു.

3
എന്നവർ പറഞ്ഞ നേര "മെങ്കിൽ കെട്ടഴിക്ക, കാൺക -
യിന്നീ വൻപടയെയെങ്ങുമിടവിടാതിഷ്ടം പോലെ"
എന്നു കാകുൽസ്ഥൻ ചൊൽകേയെങ്ങും പോയ് നടന്നു കണ്ടു
ചെന്നറിയിച്ചൂ പടപ്പെരുപ്പം രാവണനോട്.

4
പടയുടെ പെരുപ്പമിപ്പോളിടവിടാതുള്ളവണ്ണം
പറയുവാൻ പണിപ്പെടുമെന്നാലുമിതാ, പറയാം
കടലുമേഴുമലയും ഭൂമിയാകാശം കാടും
ഇടതൂർന്ന കപിസൈന്യത്താൽ നിറഞ്ഞൂ ലങ്കേശായിന്ന്

5
ലങ്കേശാ കേൾക്ക, വാനിൽ തൊടുമാറു വാൽ നിറുത്തി
തന്നെപ്പോലുള്ള നൂറുകോടി വീരന്മാർ ചുറ്റി
മിന്നലു പോലെ മെയ്യിൻ നിറമുള്ളവനെക്കാൺക
രാമന്റെ വലത്തുഭാഗം, മൈന്തനെന്നവനു പേര്.

6
അവനുടെ വലത്തുനില്പൂ കീർത്തിമാൻ താരനെന്നോൻ
ശിവനോടുമേറ്റുമുട്ടാൻ പോന്ന കരങ്ങളുള്ളോൻ.
ചുവടൊന്നായ് ചേർന്നു നിൽക്കും വീരന്നു പേരു ധൂമ്ര -
നവനോടൊത്തവരില്ലാ കപികളിലാരും പോരിൽ

7
ഇടത്തു നിൽക്കുന്നവനു ജാംബവാനെന്നു നാമം
എവിടെയും സംസാരിക്കാനഴകാർന്ന ഭാഷയുള്ളോൻ
കരുത്തൻ ദംഭനെന്നുള്ള കപിവരൻ പിന്നെക്കീർത്തി
പെരുത്തുള്ള സൈന്യാധിപനഴകുള്ള സന്നാദനൻ.

8
അഴകൻ സന്നാദനൻ കൈയ്യൊരു കയ്യാൽ പിടിച്ചു ചെമ്പൊൽ -
ത്തളിരിന്റെ ചന്തം തോൽക്കും ചാരുശരീരമുള്ളോൻ
അണിഞ്ഞ കിരീടത്തിന്റെ തിളക്കത്തിൽ വിളങ്ങുന്നോൻ
അരികൾക്കന്തകൻ ക്രഥൻ പിന്നെ നിൽക്കുന്നൂ വീരൻ

9
മാറ്റും മൃതിയെപ്പോലുമുൾക്കരുത്താൽ, ശത്രുക്കൾ
തോറ്റു കൈവണങ്ങും വമ്പുള്ളവനാം പ്രമാഥിയെന്നോൻ
കാറ്റിനെ വേഗം കൊണ്ടു കടക്കുന്നോ,നേതു രൂപം
മാറ്റി വരിക്കുമെന്നതറിവീലാ പടയിൽ നിൽക്കേ

10
പടയിൽ തുടർന്നു കാണ്മൂ തടിയൻ ഗവാക്ഷനെ, യുൾ -
ക്കടുപ്പം ചേർന്നോരു ഗജൻ, കൂടേ ഗവയൻ പിന്നെ
വടിവുറ്റ ശരഭൻ, ഗന്ധമാദനൻ തൊട്ടരികേ,
ഉടനേ കേസരി, പിന്നെ ചൊല്ലാർന്ന ശതബലി

11
ശതബലിക്കടുത്തിടത്തായ് തടുക്കുവാനെന്ന മട്ടിൽ
ഉടക്കും മദയാനക്കൂട്ടത്തിനു സിംഹമായി
വിലമതിക്കുവാൻ പറ്റാബ്ബലമിണങ്ങിയ നളൻ
എതിരിടുന്നോർക്കു കാലൻ നീലൻ മറ്റേവനയ്യാ!