ജോ-ആൻ ലിയോൺ കവിതകൾ - പരിഭാഷ, ഫ്രാൻസ്

രണ്ടു കവിതകൾ
ജോ- ആൻ ലിയോൺ

(എല്ലെസ് - മോഡേൺ ഫ്രഞ്ച് പോയട്രി ബൈ വിമൻ എന്ന സമാഹാരത്തിൽ നിന്നുള്ള കവിത. 1980- 90 കാലത്ത് ശ്രദ്ധിക്കപ്പെട്ട ഒരു ഫ്രഞ്ച് എഴുത്തുകാരി, കൂടുതൽ വിവരങ്ങൾ ലഭ്യമല്ല)

1. പൂവ്

നിൻ്റെ ജനാലക്കൽ നിന്ന്
എന്നെ നോക്കിച്ചിരിച്ചൂ നീ
തൊട്ടാൽ പൊടിയും മൃദുവാം
വിളറിനേർത്ത കുഞ്ഞു പൂവേ,
പട്ടിനേക്കാൾ മൃദുലമായ
മൃദുലമായയിതളുകൾ,
വായുവിൻ വഴുതി വീഴു -
മരുവിയിലൊരു തൂവലിൻ്റെ
നൃത്തം പോലെ നേർത്തുനേർത്ത
സ്പർശമെന്നു വിചാരിച്ച്
വിരൽത്തുമ്പു വിറച്ചു നമ്മ -
ളൊന്നു തൊടാൻ കൊതിക്കുന്ന
കുഞ്ഞുങ്ങൾ തൻ മുടി പോലെ
മൃദുലമായയിതളുകൾ

നിൻ്റെ ജനാലക്കൽ നിൽക്കും
നിന്നെ നോക്കിച്ചിരിപ്പൂ ഞാൻ
ആരുമെൻ്റെ നേർക്കു നീട്ടാ-
ത്തോരു നേർത്ത കുഞ്ഞു പൂവേ.

2.പ്രതിരോധം

തുടകൾക്കിടയിലെന്നെ
തകർത്തീടും നിൻ
കിടപ്പറക്കണ്ണുകൊണ്ടെൻ
നേർക്കു നോക്കേണ്ട

നിൻ സ്വരത്തിൻ ഇരുണ്ടാഴ -
മുള്ള താരാട്ടാൽ
നശിച്ചവൾ ഞാൻ, എന്നോടു
സംസാരിക്കേണ്ട.

വിലക്കപ്പെട്ടിടങ്ങളിൽ
വിരലെത്തും നിൻ
പരുക്കൻ കൈകൾകൊണ്ടെന്നെ
തൊടുക വേണ്ട

പുറത്തേക്കു പൊടുന്നനെ
പിടിച്ചിറക്കി
പനിച്ച വായകൊണ്ടെന്നെ-
യുമ്മ വയ്ക്കേണ്ട

ഓർമ്മതൻ വന്യമാം തീവ്ര-
വിലാപഗീത -
മാണു നീ, യാകയാലെന്നെ
വിളിച്ചിടേണ്ട

ശുദ്ധമാം വെറും പൊടി നിൻ
വാക്കുകൾ, തീരാ -
ശ്ശല്യമേകുമാസക്തിക്ക -
തുറ്റൊരൗഷധം