ഒരു തലോടൽ മുറിഞ്ഞു മുറിഞ്ഞു വീഴുന്നു

1
നിന്റെ മാനത്തല്ലേ
നിറഞ്ഞത്?
പറയൂ,
എന്റെ കൈത്തലത്തിൽ പിറന്ന
മഴവില്ലായിരുന്നോ അത്?

2

തുടയ്ക്കാൻ കഴിയാതെ പോയ
കണ്ണീർത്തുള്ളി
എന്നെ വറ്റിച്ചു.

ഒരു കൈ
അതു തുടച്ചു കൊടുത്തു.
ആ കാരുണ്യത്തിൽ
ഞാൻ കഷ്ടിച്ചു
പുനർജനിച്ചു.

3
തലോടലിന്റെ ആദർശ രാഷ്ട്രം
തകർന്നു.

ഇതാ,
വെറും കൈത്തലം.

ഒന്നു തൊടട്ടെ?

4
ഒരാശ്വാസവാക്ക്
അകന്നകന്നു മായുന്നു

മാസങ്ങളിലൂടെ
വർഷങ്ങളിലൂടെ.

ഇപ്പോൾ
അറ്റം കാണാത്ത
ഒഴിഞ്ഞ ഹാൾ

നിശ്ശബ്ദത
ഒരാശ്വാസവാക്കല്ല.

5
വായുവിൽ തലോടലാണ്
കൈ വീശൽ

6
കൈത്തിരി,
തലോടൽനാളം,
ആശ്വാസവെളിച്ചം,

ഹാ!

7
നിന്നെ സമാധാനിപ്പിക്കാൻ
കഴിയാതെ പോയ തലോടലാണോ
എന്റെ കയ്യിലീ പേനയായ്
ചുരുണ്ടിരിക്കുന്നത്?
നിന്നെ സമാധാനിപ്പിക്കാൻ
കഴിയാതെ പോയ വാക്കാണോ
അതിന്റെ തൊണ്ടയിൽ
കുരുങ്ങിയിരിക്കുന്നത്?

8

കുഴഞ്ഞു പോയ ഒരു കൈ

തലോടുന്നത് സ്വപ്നം കാണുന്നു.

സ്ലോ മോഷനിൽ
അതു ചലിച്ചുകൊണ്ടിരിക്കുന്നു
ഭാവിക്കുമേൽ.

9
ആശ്വാസവാക്കുകൾ
ഞാനില്ലാത്ത ലോകത്തെ പൂക്കൾ