തിളങ്ങുന്ന വീട് - ഫുക്കാവോ സുമാക്കോ Fukao Sumako(ജപ്പാൻ, 1893-1974)

തിളങ്ങുന്ന വീട്
ഫുക്കാവോ സുമാക്കോ
Fukao Sumako
(1893-1974)

ഇതൊരു തിളങ്ങുന്ന വീട്, ഒരു മുറിയുമിരുളാത്തത്.

പെരുമ്പാറ മുകളിലുയർന്ന വീട്, ഒരു നിരീക്ഷണ ഗോപുരം പോലെ തുറന്നത്.

രാത്രിയാവുമ്പോൾ ഞാനിവിടൊരു വിളക്കു തെളിയിക്കും, സൂര്യനേക്കാളും ചന്ദ്രനേക്കാളും സ്വല്പം വലുത്.

സന്ധ്യക്കെൻ്റെ വിറക്കും വിരലുകളൊരു തീപ്പെട്ടിയുരതുമ്പോൾ
എൻ്റെ ഹൃദയമെങ്ങനെ തുള്ളിക്കുതിക്കുന്നെന്നു
ചിന്തിക്കൂ.

ഞാനെൻ്റെ മുലകളുയർത്തി
ഒരു വിളക്കുമാടം കാവൽക്കാരൻ്റെ വികാരവതിയായ മകളെപ്പോലെ
പ്രണയത്തിൻ്റെ ശബ്ദം
ഉച്ഛ്വസിക്കുകയും നിശ്വസിക്കുകയും ചെയ്യുന്നു.

ഇതൊരു തിളങ്ങുന്ന വീട്.
ഒരു പുരുഷനും നിർമ്മിക്കാനാവാത്തൊരു ലോകം
ഞാനിതിൽ സൃഷ്ടിക്കും.