കൗമാരം
ഹുവാൻ റമൊൺ ഹിമനെസ് (സ്പാനിഷ്, സ്പെയിൻ, 1881-1958)
ഒറ്റനിമിഷം നാം രണ്ടു പേരും
ബാൽക്കണിയിൽ തനിച്ചായിരുന്നു
അന്നത്തെസ്സുന്ദരോഷസ്സു തൊട്ട്
നമ്മളന്യോന്യമർപ്പിച്ചിരുന്നു.
ചുറ്റും മയങ്ങും പ്രകൃതി തൻ്റെ -
യവ്യക്തവർണ്ണങ്ങളെയുറക്കി,
ചാരവും പാടല വർണ്ണവുമാ-
മീ ശരൽസായന്തനത്തിനുള്ളിൽ
ഉമ്മ വെയ്ക്കും, ഞാൻ പറഞ്ഞു, കൺകൾ
താഴ്ത്തിയവൾ നിന്നു ശാന്തമായി
കവിളുകളെൻ നേർക്കു കാട്ടി നിന്നൂ
നിധിയൊന്നു നഷ്ടപ്പെടുത്തും പോലെ.
ചത്തോരിലകളടർന്നു വീണൂ
വീട്ടിലെക്കാറ്റില്ലാപ്പൂന്തോട്ടത്തിൽ
പകലത്തെപ്പൂക്കൾ തൻ തൂമണമീ
വായുവിലിപ്പൊഴും തങ്ങിനില്പൂ
നോക്കാൻ മുതിർന്നില്ലെൻ നേർക്കവൾ, ഞാൻ
ചൊന്നു നാം കല്യാണം ചെയ്യുമെന്ന്
സങ്കടം വിങ്ങുമാക്കണ്ണിൽ നിന്നും
കണ്ണീരുതിരുന്നുണ്ടായിരുന്നു.
No comments:
Post a Comment