ലിവർപൂളുകാരൻ സിദ്ദ് - ജറയിന്റ് ലവ്ഗ്രീൻ (വെൽഷ്)

 ലിവർപൂളുകാരൻ സിദ്ദ്

- ജറയിന്റ് ലവ്ഗ്രീൻ (വെൽഷ്)

ലിവർപൂളിൽ നിന്നയാൾ 

കണ്ടുമുട്ടീ ചുറു -

ചുറുക്കുള്ള ശാന്തത്തി 

വെൽഷു പെണ്ണെ

പ്രേമത്തിൽ വീണയാൾ, 

കല്യാണം കഴിച്ചയാൾ

ഡെൻബിഷറിലവർ 

വീടും വെച്ചു.

മൂന്നു കുഞ്ഞുങ്ങൾ വെൽഷു

കുഞ്ഞുങ്ങളവർക്കുണ്ടായ്

മൂന്നുപേരും വെൽഷിൽ നിന്നു -

മകലുമോ ഹേ!

ഇല്ലില്ലെന്നു പറഞ്ഞൂ 

സിദ്ദ്,

സ്വന്തമൊരു ഭാഷയുണ്ടേ-

യവർക്ക്.

ഒന്നാം നാളു തൊട്ടു തന്നേ 

സിദ്ദും

കുഞ്ഞുങ്ങളോടൊപ്പം വെൽഷു 

പഠിച്ചേ.

വെൽഷു ഭാഷ മൊഴിയുന്ന ലിവർപൂളുകാരനാണു

സിദ്ദിപ്പോൾ!

നമ്മുടെയീപ്പുരാതന 

ഭാഷ

എങ്ങനെയോ ജീവിക്കു-

ന്നിന്നും.

സത്യം തന്നെ, യയാളുടെ 

കുഞ്ഞുങ്ങളുമവരുടെ 

കുഞ്ഞുങ്ങളും വെൽഷു ഭാഷ 

പറവൂ.

ഓരോ നാളു-

മീ വിശ്വാസം

കാക്കുന്നോരേ നന്ദി

ഓരോ വഴി-

ക്കീ വിശ്വാസം

ഘോഷിപ്പോരേ, നന്ദി

നിങ്ങളോടുമെന്നോടും

ഇങ്ങനെ വ്യക്തമായ്ത്തന്നെ -

യുച്ചത്തിൽ ഘോ-

ഷിക്കുന്നോരേ, നന്ദി :

"ഈപ്പുരാതന ഭാഷ

മരിക്കുകയില്ല"

വെയിൽസിലുണ്ടാകാം 

സിദ്ദിനെപ്പോലെ

ഇങ്ങനെയായിരമാളുക,ളെന്നാ -

ലീ ലിവർപൂളിൽ

ഒരൊറ്റ സിദ്ദേയുള്ളൂ

എന്റെയച്ഛൻ സിദ്ദ്.