ഭൂമിവിഴുങ്ങിപ്പൂക്കൾ
ഭംഗിയുള്ള പൂക്കൾ!
പക്ഷേ, നടരുത്
മറ്റൊന്നിനേയും വളരാൻ വിടാതവ
ഭൂമി വിഴുങ്ങും.
ഇക്കൂട്ടരുണ്ടായിരുന്നുവോ നമ്മുടെ
നാട്ടുപൂക്കൾക്കുമിടയിൽ?
പഴങ്കവിതയിലെ
കാക്കപ്പൂ തുമ്പ കണ്ണാന്തളികളിൽ?
വിദേശത്തുനിന്നെത്തിയവരെന്നോ?
എങ്കിൽ ഞാനോർത്തെടുക്കട്ടേ
വിദേശകവിതകളിലെ പൂക്കൾ.
1807-ലെ ഡാഫൊഡിൽ പൂവൊരു
കാട്ടുപൂവോ കളയോ?
ഡാഫൊഡിൽ ട്യൂളിപ്
ഹയസിന്തുകൾക്കിടയിൽ
പതുങ്ങിയിരുന്നവർ
നമ്മുടെ മണ്ണിലിറങ്ങിയതാവുമോ?
എങ്ങു നോക്കിയാലും
മഞ്ഞ നിറത്തിൽ സൂര്യകാന്തി മാതിരി കുഞ്ഞു പൂക്കൾ.
തല നുള്ളി നട്ടാൽ
നാടു മൂടും.
ജി.യുടെ നാട്ടുകാന്തികൾക്കിടയിലൂടവ
നൂണു കടന്നുവന്നതാകുമോ?
വാൻഗോഗിന്റെ
വിദേശ കാന്തികൾക്കിടയിലൂടെയോ?
അല്ലെങ്കിൽ
വാൻഗോഗിൻ സൂര്യകാന്തിയെ ധ്യാനിച്ചു നിൽക്കുന്ന
മലയാള മഞ്ഞപ്പൂക്കളിലൂടെയോ?
പൂക്കളുടെ ഒരു ലോകമൊരുക്കാൻ
കളകൾക്കാണു തിടുക്കം!
No comments:
Post a Comment