പൂക്കാലവും ഇലപൊഴിയും കാലവും (ഒരു കൊച്ചു കുട്ടിക്ക്) - ജെറാൾഡ് മാൻലി ഹോപ്കിൻസ്

 പൂക്കാലവും ഇലപൊഴിയും കാലവും

(ഒരു കൊച്ചു കുട്ടിക്ക്)

- ജെറാൾഡ് മാൻലി ഹോപ്കിൻസ്

സ്വർണ്ണവൃക്ഷങ്ങൾ ഇലപൊഴിക്കെ,

മാർഗരറ്റ്, നീ കരയുന്നതെന്തേ?

കരുതൽ മനുഷ്യരോടുള്ള പോലീ -

യിലകളെയോർത്തുമുണ്ടല്ലയോ നിൻ

തളിരിടും പുത്തനാം ചിന്തകൾക്ക്?

ഹൃദയത്തിനു വയസ്സേറിടുമ്പോൾ

തണുവേറുമിത്തരം കാഴ്ച്ചകൾക്കും.

ചെലവാക്കാനൊരു നെടുവീർപ്പു പോലും

നിനക്കില്ലെന്നായ്ത്തീരും പിന്നെപ്പിന്നെ.

ചീയും പഴുക്കിലക്കൂമ്പാരത്തിൻ

ലോകങ്ങളെങ്ങും കിടക്കുമ്പോഴും.

എന്നാലുമപ്പൊഴും തേങ്ങിടും നീ

തേങ്ങുന്നതെന്തിനാണെന്നറിയും.

പേരെന്തുമാവട്ടെ, കുഞ്ഞേ, ദുഃഖ -

മൂറുമുറവകളൊന്നു തന്നെ.

കേൾക്കും ഹൃദയ,മൂഹിക്കുമാത്മാ-

വാവില്ലതാവിഷ്കരിക്കാനെന്നാൽ.

വീണടിയുന്ന മനുഷ്യന്നായി

മാർഗരറ്റ്, തേങ്ങുന്നു നീ നിനക്കായ്