ഞൊറികൾ

 ഞൊറികൾ

അകത്തെ മുറിയിൽ നിന്നും

തയ്യൽ മെഷീന്റെ ഈരടി

കാലെഴുതുമീരടി.

നിശ്ശബ്ദത

വീണ്ടും

ഈരടി

നിശ്ശബ്ദതക്കു ശേഷം

ഒരു വാക്ക്.

ഒന്നേയൊന്ന്.

പിന്നെ നീണ്ട

നിശ്ശബ്ദത

തുടർന്ന്

ഒരാറടി

അതു കഴിഞ്ഞുള്ള

നിശ്ശബ്ദതക്കു ശേഷം

ഒറ്റയടിക്കൊരു പത്തടി.

പിന്നൊരനക്കവും കേൾക്കാതായപ്പോൾ

അകത്തെ മുറിയിലേക്കു പാളിനോക്കി

തയ്യൽ മെഷീന്റെ സൂചിത്തുളയിൽ

നൂലോടിക്കും മെലിഞ്ഞ കൈ

വിരൽത്തുമ്പോളം

കൂർത്തെത്തുന്ന

നേർത്ത ചുണ്ട്.

തയ്ച്ചു തീരാറായ

പാവാട

ഒഴുകുന്നു

ഞൊറിയിട്ട്.