മൂന്നില/മൂന്നുനില മൗനം

 

മൂന്നില / മൂന്നുനില മൗനം

ചുണ്ടിൽ നിന്നു തുടങ്ങി

നീണ്ടു വളഞ്ഞു പോകുന്ന

കുഴലിനറ്റത്തെ കോളാമ്പിപ്പൂവിടർച്ചയിലെ

ട്രംപെറ്റ് മൗനം.

പാടുന്നയാൾക്കു പാടുന്ന ഹരം

കേൾക്കുന്നയാൾക്കു കേൾക്കുന്ന ഹരം

അത്ഭുതവിളക്കിൽ നിന്നും

ഉയർന്നു കറങ്ങിപ്പൊങ്ങുന്ന

പുകച്ചുരുളിനറ്റത്തെ

ഭൂതമുഖ മൗനം.

ചോദിച്ചതെല്ലാം

അതു കൊണ്ടുതരുന്നു.

ആഘാതത്തിൽ വിടർന്നു നിവർന്നു

പൊതിയുന്ന

പാരച്ച്യൂട്ട് മൗനം

ഇരുകാലിൽ നമ്മെ ഭദ്രം

നിലത്തിറക്കും മൗനം.

ഹരം പിടിച്ചു ....

ചോദിച്ചതെല്ലാം ലഭിച്ചു....

കാലുകൾ വീണ്ടും നിലം തൊട്ടു.