ആലേഖനം
ഒന്നിൽ തന്നെ മുഴുകിയിരിക്കലാണ്
രസം!
ഒന്നിൽ തന്നെ മുഴുകി മുഴുകിയിരുന്ന്
യാന്ത്രികമായിപ്പോകുമോ
എന്നതാണ് ഭയം!
എന്നാൽ
*ചിത്രഭാനു മാഷ് പ്രസംഗിക്കുമ്പോൾ
അതിൽ മുഴുകി രസിച്ചിരിക്കേ
ഞാൻ ആനന്ദപൂർണ്ണമൊരു
യന്ത്രമായ് മാറുന്നു.
മാഷുടെ വാക്കുകൾ എന്നിലൂടൊഴുകുന്നു.
ആ സംസാരത്തിൻ
അതീവ സൂക്ഷ്മമാമുയർച്ചതാഴ്ച്ചകൾ
എന്നിലടയാളപ്പെടുന്നു.
ഒരാശയത്തിനും അടുത്ത ആശയത്തിനുമിടയിൽ
ഖണ്ഡിക തിരിയുന്ന ഇടവെളി
തെളിയുന്നു
ഇടവഴികൾ തെളിയുന്നു.
ഇപ്പോൾ ഒരച്ചടിയന്ത്രമാകുന്നു ഞാൻ.
സദസ്സിന്റെ കോണിൽ ഒതുങ്ങിയിരിക്കുന്ന
കൊച്ചു പ്രിന്റർ.
മാഷു പ്രസംഗിച്ചു നിർത്തിയ നിമിഷം
അതത്രയും രേഖപ്പെടുത്തിയ താളുകൾ
നിൽക്കാതെ നീണ്ടു വരുന്നൂ പുറത്തേക്ക്.
ഞാൻ കയ്യു നീട്ടിയെടുക്കുമാ ലേഖനം!
* സി.പി. ചിത്രഭാനു മാസ്റ്റർ - അദ്ധ്യാപകൻ, സാംസ്കാരികപ്രവർത്തകൻ, പ്രഭാഷകൻ, എഴുത്തുകാരൻ.
No comments:
Post a Comment