കവിയുടെ പച്ച
"അതാ ആ നിറമാണ്
കവിയുടെ പച്ച.
പോയറ്റ്സ് ഗ്രീൻ..."
അന്തിമാനത്തേക്കു ചൂണ്ടി
ഒരിക്കൽ *സുജാതട്ടീച്ചർ
പറഞ്ഞു.
എന്നിട്ട് പതിവുപോലെ
കണ്ണിറുക്കിച്ചിരിച്ചു.
ഞാൻ നോക്കുമ്പൊഴേക്കും
അതു മാഞ്ഞു പോയി.
പെട്ടെന്നു മായും,
അതാണതിന്റെ പ്രത്യേകത,
ടീച്ചറും മാഞ്ഞു.
ഏതാണാ നിറം?
അന്തിമാനത്ത്
ഞാനെപ്പൊഴും തേടുന്നു.
വായിക്കുന്ന കവിതയിൽ
ഇടക്കൊരു നിമിഷം
അതു പൂത്തു കൊഴിയും പോലെ തോന്നുന്നു...
* സുജാതാദേവി - അദ്ധ്യാപിക, എഴുത്തുകാരി
No comments:
Post a Comment