മറവിച്ചുവടുകൾ

 മറവിച്ചുവടുകൾ

എന്റെ സുഹൃത്തുമായി വേർപെട്ട

എന്റെ മറ്റൊരു സുഹൃത്ത്

എന്റെ ഏറ്റവുമടുത്ത സുഹൃത്തുമൊത്തു

ജീവിക്കാൻ തീരുമാനിച്ചപ്പോൾ

ഒരു കാരണമുണ്ടാക്കി

ആദ്യമേ മുറിച്ചിട്ടു,

എന്നോടുള്ള സൗഹൃദം.

സുഹൃത്തും

മറ്റൊരു സുഹൃത്തും

ഏറ്റവുമടുത്ത സുഹൃത്തുമിപ്പോൾ

എനിക്കില്ല.

അമ്പരന്നുപോയ ഞാൻ

അന്നൊരിക്കൽ

'മറ്റൊരു സുഹൃത്തി'നെ 

വഴിയിൽ വെച്ചു കണ്ടു.

നീണ്ട മുടി വെട്ടി

ബോബു ചെയ്തിരുന്നു.

പതിവായി സാരിയുടുത്തിരുന്ന ആൾ

പാന്റും ഷർട്ടുമിട്ട്

കഴിഞ്ഞതെല്ലാം മറന്നെന്ന

ചുവടുറപ്പോടെ

നടന്നു പോകുന്നു.

'ഏറ്റവുമടുത്ത സുഹൃത്തും'

ഒരിക്കൽ നേർക്കുനേർ വന്നു.

പഴയ അതേ രൂപം.

മുണ്ടും ഷർട്ടും തന്നെ.

മുന്നിലെന്നെ കണ്ടതും

ദൃഷ്ടി മാറ്റി

അടി പതറി

വീഴാൻ പോയി

വീഴാതെ

നടന്നു മാറി.