ചുണ്ടുകൾ

 ചുണ്ടുകൾ

1

ചുറ്റിലും ചുണ്ടുകൾ കത്തുന്നിതിങ്ങനെ:
ഭാഷ മരിച്ചാൽ മരിച്ചൂ പ്രണയവും


2

ബഹളത്തിനു നടുവിൽ വെച്ചേ
നിൻ്റെ മൗനം എന്നെ കൊല്ലൂ

3

വാക്കുകൾ ഓർമ്മയുടെ അരികുകളെ വിഴുങ്ങുന്നു
വാക്കുകളുടെ ചട്ടമിട്ട ഓർമ്മകൾ!

4

അവിടുത്തെ ഇച്ഛ നടക്കട്ടെ
എന്നു പാടി
മറവിയിൽ അലിഞ്ഞുപോയി
ഒരു കവിത

അവിടുത്തെ ഇച്ഛ നടക്കട്ടെ
എന്നു ഞെരങ്ങി
ഒരു വീട്
പെരുമഴയിൽ
അമർന്നു വീണു.

അവിടുത്തെ ഇച്ഛ തന്നെ നടന്നിരിക്കാം
ചുണ്ടിറക്കിയടച്ച എന്റെ മേലും.