ഏഴ്

 ഏഴ്

മകളുടെ കയ്യിൽ നിന്നും

അബദ്ധത്തിലെന്റെ മേൽ

വഴുതി വീണതാണീ ഏഴ്.

എന്റെ തലയിൽ അഭിഷേകം

ചെയ്യുമ്പോലെ അതു വീണു.

ഏഴിൽ ഞാൻ കുളിച്ചു.

മൂക്കിന്മേലൊഴുകിയപ്പോൾ

ഏഴിന്റെ മണമറിഞ്ഞു.

ചുണ്ടത്തു തട്ടിയപ്പോൾ

ഏഴിന്റെ രുചി കണ്ണീർ -

പ്പുളിപ്പല്ലെന്നിന്നറിഞ്ഞു.

പഠിക്കുന്ന കാലത്തെന്നെ

പറ്റിച്ച മായാവിയേഴ്.

കണ്ണാടിയിൽ ഒന്നു നോക്കി

ഏഴിൽ കുളിച്ചു നിൽക്കുമെന്നെ

കാണാനിപ്പോൾ എന്തു ഭംഗി!

എഴുതിരിയിട്ട വിളക്കുപോലെ.

കണക്കിലെന്നെ തോൽപ്പിച്ച

ലോകമിതു കാണട്ടെ!

ഏഴിൽ മുങ്ങിയൊഴുകാലെ

ഞാൻ പുറത്തു പോകട്ടെ!