ഇശൈ

സഖാവേ!

ഇശൈ

ദൈവം എന്നോടു ചെയ്യുന്ന
പ്രയോജനമുള്ള ഒരേയൊരു കാര്യം
അതിരാവിലെ എന്നെ എഴുന്നേല്പിച്ചു വിടുന്നതു തന്നെ.
നേർത്ത ഇരുട്ടിൽ അവ്യക്തമായ് കാണാവുന്ന മനുഷ്യർ
ഓരോരുത്തരും തമ്മിൽ തമ്മിൽ അടുപ്പത്തോടിരിക്കുന്നു
ഓരോരുത്തരും തമ്മിൽ തമ്മിൽ സ്നേഹിക്കാൻ ശ്രമിക്കുന്നു
എന്നെ ദൂരെ കണ്ടതും
മധുരം കുറവുള്ള ആറ്റാത്ത ചായയൊന്ന്
തയ്യാറാക്കാൻ തുടങ്ങുന്നു
കൂനുള്ള ആ ചായമാഷ്.
ഞാൻ വരും മുമ്പേ
എന്റെ പതിവു മേശമേൽ
ചായ വന്നിരിക്കും.
അത് ഒരു പൂച്ചെണ്ട്
എന്നു വെളിപാടുണ്ടായ ദിവസം
അങ്ങേർക്കു കേൾക്കാത്ത വിധത്തിൽ
കണ്ണീരു മറച്ചുകൊണ്ട്
ഞാനയാളെ സഖാവേ എന്നു വിളിച്ചു.