ദൗ ദൗ(ചൈന, ജനനം: 1951)
ആംസ്റ്റർഡാമിൻ്റെ നദി
നവംബർ രാവു പടർന്നിറങ്ങുന്ന നഗരത്തിൽ
ആംസ്റ്റർഡാമിൻ്റെ നദി മാത്രം.
പെട്ടെന്ന്
വീട്ടുമരത്തിലെ മധുരനാരങ്ങകൾ
ശരൽക്കാറ്റിൽ കുലുങ്ങുന്നു.
ഞാൻ ജനലടക്കുന്നു,
എന്നാൽ ഒരു പ്രയോജനവുമില്ല.
നദി മേലോട്ടൊഴുകുന്നു,
എന്നാൽ ഒരു പ്രയോജനവുമില്ല.
പളുങ്കുകൾ പതിച്ച് സൂര്യനുയരുന്നു
പ്രയോജനമില്ല.
ഇരുമ്പുധൂളികൾ പോലെ
പ്രാവുകൾ ചിതറിപ്പറക്കുന്നു.
പയ്യന്മാരില്ലാത്ത തെരുവുകൾ
പെട്ടെന്നതിവിസ്തൃതമാകുന്നു.
ശരൽക്കാല മഴക്കു ശേഷം
ഒച്ചുകൾക്കൊപ്പമിഴയുന്ന മേൽക്കൂര
- എൻ്റെ രാജ്യം
മെല്ലെയൊഴുകുന്നു
ആംസ്റ്റർഡാമിൻ്റെ നദിമേലെ.
No comments:
Post a Comment