സെർഹിയ് ഷദാൻ (ഉക്രൈൻ, ജനനം: 1974)
വേനലിൽ
വേനലിൽ ഏവരും
നദിയുടെ തണുത്ത സ്പർശം കൊതിക്കുന്നു
വേനൽപ്പൂന്തോട്ടത്തിലെ കിളികൾ
അടക്കമില്ലാത്ത ഉന്മാദികൾ.
രണ്ടു മരങ്ങൾ കുന്നിൻ മുകളിൽ
മുഖാമുഖം നിൽക്കുന്നു,
ഒരിക്കൽ ഒരാശുപത്രിമുറി പങ്കിട്ട ശേഷം
ഇപ്പോൾ വീണ്ടും കണ്ടുമുട്ടുന്ന രണ്ടു മനുഷ്യരെപ്പോലെ
വേനൽ അനന്തമാകയാൽ
എല്ലാം നിൽക്കുന്നു നിശ്ചലം.
നിരത്തുവക്കത്തെ മുള്ളുകൾക്കുമേൽ
സന്ധ്യക്കു ചന്ദ്രനുദിക്കുന്നു.
പകലുകളേറെ നീണ്ടതാകയാൽ
ഒടുവിൽ അന്തിയാകുമ്പോൾ
ഓരോരുത്തരും ഇരുട്ടിൽ ആഘോഷിച്ചു തിമിർത്ത്
ഉറക്കമില്ലാത്തവരാകുന്നു.
ആകാശം ഒരു കൗമാരക്കാരൻ.
കയ്യിൽ പാഠപുസ്തകങ്ങളുള്ള,
നക്ഷത്രങ്ങളെ തരംതിരിക്കുന്ന,
കയ്യേറ്റക്കാരോടെന്ന മട്ടിൽ കിളികളോടു തർക്കിക്കുന്ന,
ഒരു കൗമാരക്കാരൻ.
ഒരു മരം മറ്റൊന്നിനെ ശ്രദ്ധയോടെ കേൾക്കുന്നതുപോലെ
ഇലകൾ നിശ്ചലം,ചില്ലകൾ നിശ്ശബ്ദം.
No comments:
Post a Comment