ടൂൺ ടെല്ലഗൻ
(നെതർലാൻഡ്സ്, ഡച്ച്,ജനനം: 1941)പ്രശസ്ത ഡച്ച് കവിയും ബാലസാഹിത്യകാരനുമായ ടൂൺ ടെല്ലഗൻ തൻ്റെ അച്ഛനെ കുറിച്ചെഴുതിയ കവിതകളുടെ സമാഹാരമായ റാപ്ടേഴ്സിൽ നിന്ന് എടുത്ത കവിതകളാണിവ. ഇരപിടിയൻ പക്ഷികൾ എന്നാണ് റാപ്ടേഴ്സ് എന്ന വാക്കിനർത്ഥം. പുസ്തകത്തിലെ കവിതകളുമായി ചേർച്ചയില്ലാത്ത ആ പേരിട്ടതിനെപ്പറ്റി, കണ്ണും പൂട്ടി നിഘണ്ടുവിൽ നിന്ന് താനെടുത്തതാണാ വാക്ക് എന്നാണ് കവി പുസ്തകത്തിൻ്റെ ആമുഖക്കുറിപ്പിൽ പറയുന്നത്.
എൻ്റെയച്ഛൻ
നിഷ്കളങ്കതയാൽ കൈ കഴുകി
"മറ്റെന്തിലാണ് ഞാൻ കൈ കഴുകുക?"
അച്ഛൻ ചോദിച്ചു
എന്നിട്ട് അമ്മയെയെടുത്ത്
ജനലിലൂടെ പുറത്തേക്കെറിഞ്ഞു.
"അവിടെക്കിട" അച്ഛൻ കരഞ്ഞു,
എന്നിട്ടെൻ്റെ സഹോദരന്മാരെയും പുറത്തേക്കെറിഞ്ഞു.
എന്നിട്ടും ഒരോരുത്തരും
അച്ഛനുവേണ്ടി മുറവിളി കൂട്ടി
അച്ഛനെ ആവശ്യപ്പെട്ടു.
അതീവ ഗൗരവത്തിലും ദുഃഖത്തിലുമായിരുന്ന
അച്ഛൻ
ഒരു പൂപ്പാത്രത്തിനുള്ളിലേക്കു കയറി
അവിടെയിരുന്ന്
വാടിക്കുഴഞ്ഞു.
******
എൻ്റെയച്ഛൻ
ഏഴാം സ്വർഗ്ഗത്തിലായിരുന്നു.
അമ്മ അച്ഛനെ അവിടെച്ചെന്നു കണ്ടു
താൻ ഒന്ന് ഉമ്മവയ്ക്കട്ടേ എന്ന് അമ്മ ചോദിച്ചപ്പോൾ
അച്ഛൻ പറഞ്ഞു:
"അതിനു വേണ്ടിയുള്ളതാണ് മറ്റു സ്വർഗ്ഗങ്ങൾ"
കൈകൾ മടിയിൽ വെച്ച്
നിശ്ശബ്ദരായി അവർ ഇരുന്നു
ബഗോണിയപ്പൂക്കളും സൈക്ലമൺ പൂക്കളും
അവിടെയുണ്ടായിരുന്നു.
മരണത്തിൻ്റെ മണവും.
ഇടക്കിടക്കൊരു മാലാഖ വന്ന് ജനലിലൂടെ എത്തി നോക്കി
തന്നോടേറ്റുമുട്ടാൻ താല്പര്യമുള്ള ആരെങ്കിലുമവിടെയുണ്ടോ
എന്നു ചോദിച്ചു.
അച്ഛൻ തല കുലുക്കി,
തുടർന്നും തനിക്ക് അദ്ദേഹത്തെ സ്നേഹിക്കാമോ എന്ന്
അമ്മ ചോദിച്ചു,
വ്യവസ്ഥകളോടെ, ബാഹ്യമായെങ്കിലും.
വാതിലുകൾ കിരുകിരുത്തു
"അത് പിടിച്ചു നിർത്ത്"
അച്ഛൻ അലറി.
എന്നിട്ട് ചാടിയെണീറ്റു.
അനന്തത അവസാനിച്ചിരുന്നു.
എൻ്റെ സഹോദരന്മാർ മേശക്കരികിലിരുന്നു
എന്നത്തേക്കാൾ ദുഃഖിതരായി.
*****
എൻ്റെയച്ഛൻ
ഒരു കണ്ണാടിയിൽ നോക്കി
"കൺവട്ടത്തീന്നു പോ"
ഒട്ടും പുറത്തുകേൾക്കാതെ മൃദുവായി
അച്ഛൻ പറഞ്ഞു.
തൻ്റെ കൺവട്ടത്തുനിന്നദ്ദേഹം മാഞ്ഞുപോയി.
അമ്മയും സഹോദരന്മാരും നൃത്തം ചെയ്തു,
വികൃതമായി,തീർത്തും അനാവശ്യമായി.
സന്തോഷമില്ലാത്ത സന്തോഷത്താൽ,വർഷങ്ങളോളം,
തങ്ങൾക്കു നഷ്ടപ്പെടാത്തവയെക്കുറിച്ചെല്ലാം
ചിന്തിച്ചുകൊണ്ട്.
വിളർത്ത് നെഞ്ഞുപൊട്ടുംപോലായി,
പിന്നെയച്ഛൻ.
ഡസൻ കണക്കിനു കണ്ണാടികളിൽ നോക്കി
തടാകങ്ങളിലും നദികളിലും ചാഞ്ഞുനോക്കി
ജാലകങ്ങളിലൂടെ നോക്കി
തെരുവിൽ ഓരോരുത്തരേയും തടഞ്ഞുനിർത്തി സംസാരിച്ചു.
പക്ഷേ അച്ഛന്
തന്നെ
പിന്നെ കണ്ടെത്താനേ കഴിഞ്ഞില്ല
പിന്നെ കണ്ടെത്താനേ കഴിഞ്ഞില്ല
No comments:
Post a Comment